Дастаткова адзін раз прачытаць творы Якуба Коласа, каб уражанне засталося на ўсё жыццё. Мы добра помнім з дзяцінства хлапчука Кастуся, якога «кліча рэчка, цягнуць санкі з дому», дзяўчынку Алесю, якую так пяшчотна гадавала матуля, і іншыя родныя вобразы.
Гэтымі знакавымі днямі паўсюль праходзяць розныя імпрэзы – ладзяцца выставы, коласаўскія чытанні, экскурсіі, праходзяць вечары, віктарыны і конкурсы.
Напярэдадні юбілейнай даты мы завіталі ў Бобрскую сярэднюю школу. Вучні старшых класаў адправіліся ў горад Мінск, каб наведаць літаратурны музей Якуба Коласа. А маленькія падчас канікул прыходзяць у аздараўляльны лагер «Восеньская казка». У гэты дзень настаўнікі прапанавалі ім здзейсніць падарожжа у літаратурную краіну. Разам адправіліся і мы. Яны з радасцю падзяліліся з намі ведамі пра пісьменніка:
– Дзень нараджэння Якуба Коласа адзначаецца 3 лістапада.
– Якуб Колас – гэта псеўданім пісьменніка. На самой справе яго завуць Канстанцін Міхайлавіч Міцкевіч. У дзяцінстве родныя называлі яго Кастусь.
– Якуб Колас нарадзіўся ў простай сялянскай сям’і. Яго бацька быў лесніком і часта браў сына ў лес.
– А калі паэт вырас, то напісаў шмат твораў з апісаннем лясных пейзажаў, якія запомніліся яму з дзяцінства.
Ведаюць ужо маленькія чытачы і творы пісьменніка:
– «Хлопчык і лётчык».
– «Рак-вусач».
– «Алеся».
– Калі мы падрасцём, то будзем чытаць паэму «Новая зямля».
Падчас правядзення літаратурнага падарожжа дзеці з цікавасцю разглядалі фотаздымкі па творчасці Якуба Коласа. Зацікавілі іх сямейныя фатаграфіі, на якіх маленькаму Кастусю ўсяго шэсць гадоў. Некаторыя адзначылі, што зараз яны на год старэйшыя за тагачаснага Кастуся. Пранікнёна паслухалі відэазапіс песні на словы песняра «Мой родны кут, як ты мне мілы». Разам з настаўніцай Зінаідай Мігаль пачыталі верш «Хлопчык і лётчык». Натхнёныя, пагулялі ў інтэрактыўную гульню «Верталёцікі» і самі адчулі сябе лётчыкамі і зразумелі, чаму так марыў ім стаць герой верша. Дзяўчаткі ў вяночках закружыліся ў карагодзе.
– Творы Якуба Коласа вучаць нас любіць прыроду і беражліва адносіцца да яе, паважаць людзей і шанаваць роднае слова – нашу беларускую мову, – падчас завяршэння імпрэзы зрабілі такі вывад хлопчыкі і дзяўчынкі.
Іна ГАРА.
