У творчых майстэрнях Цэнтра ўжо адчуваецца атмасфера цёплай і добрай казкі. Цуды тут робяць сваімі рукамі. Чаго тут толькі няма! Навагоднія сувеніры і кампазіцыі, казачныя персанажы і цацкі – усё гэта стварылі дзеці на выставу-конкурс «Калядная зорка».
– Падведзены вынікі раённага этапа рэспубліканскай выставы-конкурсу дэкаратыўна-прыкладной творчасці «Калядная зорка», – распавядае дырэктар Цэнтра Вераніка Сяліцкая. – На конкурс былі прадстаўлены 87 творчых работ з 11-ці ўстаноў адукацыі і адной установы дадатковай адукацыі па наступных намінацыях: «Навагодняя ялінка», «Ёлачная цацка», «Сувенір-падарунак», «Беларуская зіма», «Зімовыя святы Беларусі», «Зімовы спорт», «Арт-аб’ект», «Навагодні персанаж» і «Навагодні касцюм». Удзельнікі прадставілі на конкурс работы, выкананыя ў розных відах дэкаратыўна-прыкладной творчасці. Трэба адзначыць, што ўдзельнікі праявілі творчы падыход як пры стварэнні экспанатаў, так і ў назвах да іх. Журы ацэньвала работы па такіх крытэрыях: захаванне беларускіх народных рамёстваў, выкарыстанне новых матэрыялаў і тэхналогій, кампазіцыйнае і каляровае рашэнне, спалучэнне традыцыйнага мастацтва і сучаснай культуры, творчая індывідуальнасць, глыбіня мастацкай ідэі, узровень выканаўчага майстэрства. Пераможцы і прызёры ўзнагароджаны Дыпломамі ўпраўлення па адукацыі, спорце і турызме райвыканкама. Дваццаць лепшых работ прадстаўлены на абласны этап. Дарэчы, 1-е месца атрымала работа «Насустрач Калядам» у намінацыі «Сувенір-падарунак» навучэнкі філіяла Цэнтра ў Халопенічах Яраславы Ганчаровай (педагог дадатковай адукацыі Марына Патапчык). Работа прыме ўдзел у заключным, рэспубліканскім, этапе. Чакаем вынікі другога і трэцяга месцаў.
З задавальненнем дзеці наведваюць Цэнтр дзіцячай творчасці, дзе можна раскрыць свой талент, правесці цікава час і зрабіць падарунак сваім блізкім.
– У гэтым навучальным годзе я стала наведваць аб’яднанне па інтарэсах «Дэкаратыўны дызайн», – дзеліцца Арына Швед. – Навучылася рабіць мяккія цацкі. У маім «заапарку» ўжо ёсць кот, заяц, сабака. Хутка надыдзе Новы год. Таму мы працуем над стварэннем святочных упрыгожванняў. Самы чароўны час – гэта падрыхтоўка да свята.
– На навагоднія святы ўсе атрымліваюць падарункі, – кажа Ганна Лемех. – Таму я рыхтую сваім сястрычкам Насце і Леры сувеніры сваімі рукамі. Гэтаму нас вучаць у Цэнтры дзіцячай творчасці. Адчуванне казкі хутка надыдзе, калі вакол пачнуць гарэць рознакаляровыя агеньчыкі.
Іна ГАРА.
