У гэтым упэўнены педагагічны калектыў гарадскога дзіцячага сада № 2. Вынікі плённай працы мы бачым падчас розных раённых імпрэз: выхаванцы дэманструюць народнае адзенне, танцуюць, спяваюць пра родны край, удзельнічаюць у насаджэннях дрэў, памятных мітынгах, дзяржаўных святах.
– Вельмі важна з ранняга ўзросту закласці маральна-патрыятычныя асновы асобы, сфарміраваць у дзяцей правільныя ўяўленні пра наваколле, – кажа загадчык дашкольнай установы адукацыі Наталля Антаневіч. – Увогуле фарміраванне патрыятычных пачуццяў пачынаецца з ранняга дзяцінства. Мы пачынаем з сямейнай тэматыкі: хто каму даводзіцца – мама, тата, бабуля, дзядуля, унук. Затым паступова крок за крокам дзеці пачынаюць усведамляць паняцці – Радзіма, краіна, грамадзянін. Прыходзіць усвядомленасць, што яны – грамадзяне Рэспублікі Беларусь. Адпаведна, увесь навучальны працэс праходзіць у цесным тандэме педагогаў, бацькоў і дзяцей. Наша задача – выхаванне патрыятычных пачуццяў ва ўзаемадзеянні. Дзеці знаёмяцца з гісторыяй Беларусі, традыцыямі, народнай творчасцю, дэкаратыўна-прыкладным мастацтвам, з дзяржаўнымі святамі і сімваламі. Усё гэта праходзіць праз заняткі, гульнёвую і вольную дзейнасць. Выхавацелі праводзяць абрады, звязаныя з народнымі святамі – Багач, Калядкі, Гуканне вясны, Саракі, Масленіца, Вялікдзень. Удзельнічаюць і бацькі актыўна. Прыносяць пачастункі, спечаныя сваімі рукамі. Праводзяцца конкурсы сумеснай творчасці дзяцей і бацькоў. Напрыклад, цікава праходзіў конкурс навагодняй цацкі ў нацыянальным стылі. Што толькі ні рабілі! І вязаныя шары з беларускім арнаментам, і рукавічку Дзеда Мароза ў нацыянальным стылі. Цесна ўзаемадзейнічаем з Крупскім гісторыка-краязнаўчым музеем. Дзеці разам з выхавацелямі наведваюць выставы.
Выхаванцы дзіцячага сада № 2 г. Крупкі Аліса ВІШНЯКОВА, Ваня МАКАРЭВІЧ, Яна КРУГЛІК.
А як хлопчыкі і дзяўчынкі разумеюць слова «Радзіма»? Вось што яны кажуць:
Ваня МАКАРЭВІЧ:
– Радзіма – гэта наш дом, дзіцячы сад, мама, тата. Радзіму трэба любіць і шанаваць.
Аліса ВІШНЯКОВА:
– Калі б не было Радзімы, то і не было б людзей і дзяцей. Кветкі, птушкі, лес, рэчка – гэта наша Радзіма.
Дарына ХВАШЧЭЎСКАЯ:
– Беларусь – наша Радзіма. А ўсе людзі – яе дзеці. Мы ведаем беларускія вершы і спяваем беларускія песні, бо беларуская мова – наша родная.
Ведаюць і разумеюць дзеці, хто такі патрыёт.
Ваня БЭСМАН:
– Гэта той чалавек, які любіць сваю краіну, ніколі не пакрыўдзіць жывёл, не зламае галінку дрэва, дапаможа другому чалавеку ў бядзе.
Яна КРУГЛІК:
– Патрыёт – гэта той, хто паважае дарослых, беражліва адносіцца да роднага горада і розных помнікаў.
