Штогод кожны чацвёрты чацвер кастрычніка ва ўсім свеце адзначаецца Міжнародны дзень без паперы. Сёлета гэта свята выпала на 22 чысло.Усе мы ведаем, што папера – гэта дрэвы, якія даюць нам паветра, а значыць, жыццё. Таму задача кожнага з нас – зрабіць усё магчымае, каб захаваць лясы.
Усё часцей мы бачым, як эколагі і проста экадружалюбныя людзі раяць адмовіцца ад пластыку, але пра тое, што папера – таксама не самы «зялёны» матэрыял, кажуць не так шмат. Давайце паспрабуем скласці чэк-ліст, які дапаможа нам выкарыстоўваць як мага менш паперы ў штодзённым жыцці.
1. Электронная кніга замест папяровай
Паводле розных звестак, для вытворчасці ўсяго толькі тоны паперы выкарыстоўваюць каля пяці тон драўніны. Гэта значыць, трэба прыкладна 24 дрэвы, каб атрымаць усяго 2 000 пачкаў паперы. Акрамя таго, у велізарнай колькасці расходуецца і вада. Так, для вырабу тоны паперы ў Францыі яе затрачваецца ў сярэднім 150 000 літраў, у ЗША – 236 000, а ў Швецыі патрабуецца каля 1 млн літраў. Электронныя кнігі таксама нельга назваць абсалютна экалагічнымі. Але калі з гэтым гаджэтам абыходзіцца беражліва, а потым яго правільна ўтылізаваць, то ён сапраўды дапаможа вам выратаваць не адно дрэва.
2. Бібліятэкі і буккросінг
Неабавязкова кожны раз купляць новую кнігу, вы можаце абменьвацца з сябрамі ці з незнаёмымі людзьмі. Нават у некаторых крамах стаяць паліцы з бясплатнымі кнігамі, што ўжо казаць пра розныя суполкі ў інтэрнэце. Не забывайцеся і пра бібліятэкі!
3. Папера з макулатуры
Туалетную паперу, сшыткі, нататнікі і іншыя рэчы старайцеся купляць выключна з макулатуры. Для гэтага ўважліва чытайце склад і шукайце словы «другасная сыравіна», «другасная цэлюлоза», «другаснае валакно»,«100% другасная макулатура», «макулатура». Калі на ўпакоўцы, напрыклад, туалетнай паперы напісана: «100% першасная цэлюлоза» – значыць, дзеля яе вытворчасці высякалі дрэвы.
4. Здавайце на перапрацоўку
Кантэйнеры для паперы ёсць амаль у кожным двары, збіраюць макулатуру і ў школах. Паводле даных Асацыяцыі па пытаннях упраўлення інфармацыяй і выявамі, эканомія або перапрацоўка тоны паперы дазваляе выратаваць 17 дрэў, 26 000 літраў вады, 3 кубічных метры зямлі, 240 літраў гаручага і 4 000 кВт/г электрычнасці.
5. Шукайце знак FSC
FSC (Лясны апякунскі савет) – міжнароная арганізацыя, якая стварыла сістэму пацвярджэння экалагічнай і сацыяльнай адказнасці кіравання лясамі. Знак FSC на драўніне альбо зробленым з яе тавары – паказчык таго, што прадукцыя паходзіць з лесу, у якім вядзецца экалагічна і сацыяльна адказная лясная гаспадарка. Аднак гэта не значыць, што рэч на сто працэнтаў «зялёная». Напрыклад, такі знак нанесены на тэтрапак, які пакуль не перапрацоўваецца ў Беларусі.
Выкарыстоўвайце чарнавікі і эканамічныя шрыфты: Century Gothic, Calibri, Times New Roman. Яны дазваляюць эканоміць як расход фарбы, так і месца на лісце. Друкуйце з двух бакоў.
Удзельнічайце ў акцыях па пасадцы дрэў і заклікайце да гэтага сваіх бацькоў і сяброў.
А вы ведалі?
Штогод у свеце высякаецца больш за 125 мільёнаў дрэў.
