Хацюхоўскія юнакі і дзяўчаты праяўляюць зацікаўленасць да моладзевага грамадскага руху і з’яўляюцца яго актыўнымі ўдзельнікамі. Таму пагаварыць было пра што, вучні задалі госцю шмат пытанняў.
У прыватнасці, іх цікавіла, якія праекты БРСМ абласны лідар лічыць найбольш яркімі?
– У БРСМ з'явілася нямала адметных ініцыятыў за апошнія гады, – адказаў Кірыл Шык. – А традыцыйныя акцыі сталі яшчэ больш значнымі і маштабнымі. Напрыклад, конкурс «100 ідэй для Беларусі» – гэта рэальны шанц для кожнага заявіць пра сябе і сваю ідэю на ўсю краіну. Сёлета пераможцы атрымалі гранты на ўвасабленне сваіх задумак. Яшчэ адзін цікавы праект – «Адкрыты дыялог». Ён з’явіўся яшчэ ў 2010 годзе, апошнім часам стаў найбольш папулярнай формай зносін моладзі і ўлады. З верасня 2016 года ва ўсіх рэгіёнах краіны прайшло больш за 10 тысяч сустрэч. Сапраўдным нашым брэндам сталі валанцёрскія атрады. У радах валанцёрскага руху «Добрае сэрца» больш за 36 тысяч добраахвотнікаў, з іх больш за 9 тысяч ужо сталі ўладальнікамі асабістых кніжак валанцёра.
Хацюхоўскія старшакласнікі распыталі, што новага чакаецца ў гэтым годзе ў студатрадаўскім руху.
– Калі ўлічыць часы камсамола (а БРСМ называе сябе яго пераемнікам), то студатрады – гэта адзін з самых доўгайграючых праектаў моладзевага саюза, – адзначыў першы сакратар Мінскага абкама. – Арганізатары трэцяга працоўнага семестра ўнеслі нямала і сваіх прапаноў: цяпер у атрад бяруць з 14 гадоў, студатрады могуць працаваць круглы год, а ў лексікон вярнулася паняцце «моладзевая будоўля». З дапамогай БРСМ за апошнія тры гады падпрацоўку знайшлі больш за 350 тысяч чалавек.
Вучні падкрэслілі, што Кірыл Шык заўсёды размаўляе па-беларуску, і высветлілі яго меркаванне наконт таго, ці варта больш мерапрыемстваў праводзіць менавіта на роднай мове. На гэта ён адзначыў, што ў апошнія гады цікавасць дзяцей і моладзі да беларускай нацыянальнай культуры, традыцый, абрадаў, народных рамёстваў узрастае. Папулярнымі становяцца адпаведныя праекты. Яркае пацвярджэнне, напрыклад, «Беларусь – крыніца натхнення». Ён стаў свайго роду злучальным праектам на гады, адным з кірункаў дзейнасці БРСМ, які аб'яднаў моладзевыя ініцыятывы. У праекце выкарыстоўваюцца самыя розныя формы: фальклорныя экспедыцыі, тэатралізаваныя пастаноўкі, выставы, інтэрактыўныя экспазіцыі, творчыя конкурсы і многае іншае. Напрыклад, цяпер рэалізуюцца такія ініцыятывы, як фотаконкурс «Сэлфі & фота з вышыванкай» і акцыя «Падары немаўляці вышыванку». На думку Кірыла Шыка, беларускамоўны накірунак неабходна развіваць, што і робіцца зараз.
Цікава ўдзельнікам сустрэчы было і тое, якіх маладых людзей кіраўнік абласной арганізацыі хоча бачыць у яе радах?
– Перш за ўсё, неабыякавую моладзь, смелую, крэатыўную, – зазначыў ён. – Мы чакаем у камандзе БРСМ яркіх людзей, гатовых нешта мяняць, паляпшаць вакол сябе, тых, хто па-сапраўднаму любіць сваю краіну.
Дырэктар школы Уладзімір Рогаў выказаў спадзяванне, што такія цікавыя сустрэчы з моладзевым лідарам знойдуць свой працяг.
Фота Хацюхоўскай СШ.
