Наступіў першы месяц лета. Пляжы і зоны адпачынку насельніцтва на водных аб’ектах вось-вось пачнуць прымаць адпачываючых. Ці гатовы яны да гэтага? З такім пытаннем наш карэспандэнт звярнуўся да начальніка раённай інспекцыі прыродных рэсурсаў і аховы навакольнага асяроддзя Валерыя БЯЛАЎСКАГА.– У нашым раёне вызначана 9 зон масавага адпачынку насельніцтва. Для абуладкавання і аказання платных паслуг усе яны замацаваны за арганізацыямі раёна, – гаварыў Валерый Аркадзьевіч. – Думаю, не лішнім будзе напомніць, што, у прыватнасці, за зоны адпачынку «Выспа», «Шып», «Залаты рог» возера Сялява адказвае Крупскі лясгас. За «Панскую купальню» – заказнік рэспубліканскага значэння «Сялява», за «Камсамольскі бераг» – аддзел адукацыі, спорту і турызму райвыканкама, за «Лебядзіны бераг», што на возеры Абіда, – ААТ «Кляновічы». Зона адпачынку «Сялява Тур» замацавана за таварыствам з абмежаванай адказнасцю з аналагічнай назвай. Гарадскія пляжы № 1, што на вуліцы Набярэжнай, і № 2 на вуліцы Усходняй вадасховішча Крупскае замацаваны за ўнітарным прадпрыемствам «Жылцеплабуд».
– А цяпер, Валерый Аркадзьевіч, раскажыце, як абсталяваны зоны адпачынку?
– Каб не загрувашчваць чытачоў лічбамі, скажу, што літаральна на ўсіх іх ёсць паркоўкі для аўтамабіляў, валейбольныя, а на асобных і міні-футбольныя пляцоўкі, кабіны для пераапранання, альтанкі, спецыяльна абсталяваныя месцы для вогнішча, грамадскія прыбіральні. Ёсць кантэйнеры для збору смецця і адходаў, на ўездах устаноўлены шлагбаумы і інфармацыйныя шчыты.
Дарэчы, мерапрыемствы па ўладкаванні зон масавага адпачынку на водных аб’ектах раёна на бягучы год былі зацверджаны рашэннем райвыканкама яшчэ ў лістападзе 2014 года. А на пасяджэнні райвыканкама ў маі было разгледжана пытанне аб іх гатоўнасці.
– А што вы скажаце наконт бяспекі на вадзе?
– Каб папярэдзіць гібель адпачываючых на водах, раённым выканаўчым камітэтам распрацаваны праект рашэння, у якім вызначаны забароненыя для купання месцы. Ва ўсіх санкцыянаваных зонах адпачынку дно возера Сялява і вадаёма Крупскае прыведзена ў парадак і ёсць гарантыя, што купальшчыкі не атрымаюць траўмы.
Лабараторнай службай раённага Цэнтра гігіены і эпідэміялогіі даследавана 18 пробаў вады адкрытых вадаёмаў усіх дзевяці зон адпачынку. Пробаў вады, не адпавядаючых параметрам бяспекі, не ўстаноўлена. Суб’ектамі гаспадарання, замацаванымі за зонамі масавага адпачынку, заключаны дагаворы з аддзелам прафілактычнай дэзінфекцыі РЦГіЭ на правядзенне акарацыдных мерапрыемстваў па знішчэнні іксадавых кляшчоў, распрацаваны праграмы вытворчага кантролю вады адкрытых вадаёмаў у месцах купання на зонах з арганізацыяй правядзення лабараторных даследаванняў вады.
Наогул, напярэдадні чарговага купальнага сезона афіцыйныя зоны адпачынку знаходзяцца пад пільным кантролем. Будуць яны кантралявацца і на працягу ўсяго лета. Прырода, як бачым, падарыла нам неймавернай прыгажосці возера Сялява, і на яе берагах створаны ўсе выгоды для тых, хто прыедзе сюды на адпачынак.
