З жыхарамі раёна вялі дыялог старшыня Крупскага раённага камітэта Беларускага прафесіянальнага прафсаюза работнікаў адукацыі і навукі Алена Ліхолап і начальнік аддзела ўнутраных спраў раённага выканаўчага камітэта Дзмітрый Фіцкевіч.
На прыём прыйшла крупчанка Таццяна Крышкавец. Маладая сям’я пераехала ў дом, што ў завулку Цвяточным. Але з асноўнай дарогі практычна няма з’езду і, больш таго, сама вуліца падсыпана пяском, па якім немагчыма праехаць на машыне, асабліва пасля дажджу. Ад імя ўсіх жыхароў Таццяна звярнулася з просьбай пасадзейнічаць у добраўпарадкаванні гэтага завулка.
Тэму распаўсюджвання каранавіруснай інфекцыі ўзняла пенсіянерка Таццяна Палітыка, якая пазваніла ў грамадскую прыёмную па тэлефоне. Жанчына звярнула ўвагу на незаўсёды добрасумленныя адносіны асобных людзей да ўласнай бяспекі. Яна, у прыватнасці, адзначыла, што гэтымі днямі на Крупшчыне ўведзены абавязковы масачны рэжым, але калі зойдзеш, да прыкладу, у краму, можна ўбачыць, што маскі носяць яшчэ не ўсе. “Няўжо іх не хвалюе тое, што яны падвяргаюць небяспецы іншых людзей, асабліва пажылых?”, – з абурэннем гаварыла жанчына. І дадала: “Лічу, што за невыкананне масачнага рэжыму трэба ўводзіць штрафы, бо толькі тады ён пачне працаваць. І гэта павінна быць прапісана ў законе”.
Па тэлефоне звязаўся з дзяжурнымі грамадскай прыёмнай і жыхар вёскі Новыя Дзянісавічы Фёдар Волчанка. Сельскі механізатар, у 2010 годзе, калі споўнілася 55 гадоў, пайшоў на пенсію і, па яго меркаванні, яму прызначана невялікая па памерах пенсія. Адказ на гэта пытанне будзе дадзены па тэлефоне пасля ўдакладнення яго ва ўпраўленні па працы, занятасці і сацыяльнай абароне райвыканкама. А яшчэ Фёдар Яўгенавіч унёс прапанову, каб аператары машыннага даення кароў і механізатары, якім даводзіцца працаваць у нялёгкіх умовах, ішлі на заслужаны адпачынак, як і раней, адпаведна ў 55 і 60 гадоў.
– Падчас прыёму па тэлефоне і іншыя крупчане выказвалі свае праблемы і прапановы, – гаварыла Алена Ліхолап. – Калі не атрымлівалася вырашаць надзённыя пытанні адразу, абяцалі людзям звязацца з адпаведнымі службамі і паведаміць ім аб далейшым вырашэнні той або іншай праблемы. Наогул, у грамадскай прыёмнай прымаюцца да вывучэння розныя прапановы і ініцыятывы, яны агаворваюцца, дапрацоўваюцца, а затым будуць вынесены на грамадскае абмеркаванне. У далейшым многія з іх стануць асновай да Усебеларускага народнага сходу.
