Напярэдадні першы сакратар РК ГА «БРСМ» Алена Дубава правяла літаратурны лабірынт «Родная мова – крыніца натхнення» для вучняў Ухвальскай сярэдняй школы.
– Пачаць нашу сутрэчу вырашылі з традыцыйнай беларускай дыктоўкі, – распавяла Алена Дубава. – Тэкст быў абраны незвычайны. Усім вядома, што 30 студзеня адзначалася 100 гадоў з дня нараджэння вядомага пісьменніка Івана Шамякіна. Трэба адзначыць, што на дзесяць балаў справіўся амаль кожны. Мы пагаварылі пра жыццё пісьменніка, успомнілі яго вядомыя эпічныя творы, як «Глыбокая плынь», «Крыніцы», «Сэрца на далоні» іншыя.
А пасля каманды прынялі ўдзел у спаборніцтве па розных катэгорыях: фальклор, мова, прырода, словы. Вучні з вялікім інтарэсам адгадвалі загадкі, называлі імёны першадрукароў, растлумачвалі значэнні фразеалагізмаў. Лепшыя з іх атрымалі салодкія падарункі, а таксама літаратуру ад ГА «БРСМ».
P.S. Крупчане прынялі ўдзел у абласным свяце «Дзень роднай мовы». Мерапрыемства праходзіла ў Слуцкім раёне. Як расказала Алена Дубава, у свяце прынялі ўдзел дзяўчаты і хлопцы – пераможцы абласных анлайн-конкурсаў на лепшае чытанне вершаў на беларускай мове і конкурсу сэлфі.
– Праграма была цікавая і займальная, – адзначыла моладзевы лідар. – Мы пабывалі на тэматычнай экскурсіі па музеі слуцкіх паясоў, а пасля паглядзелі імправізаваную пастаноўку «Беларускае вяселле». Потым удзельнічалі ў анлайн-дыктоўцы, якая стала традыцыйнай не толькі ў Беларусі, але і ва ўсім свеце. Цэнтральнай падзеяй свята стаў адкрыты дыялог моладзі з актывам Мінскага абласнога камітэта «БРСМ», кіраўніцтвам Слуцкага райвыканкама, членамі Саюза пісьменнікаў Беларусі. Абласное свята аб'яднала мерапрыемствы БРСМ, якія папулярызуюць беларускую нацыянальную культуру, традыцыі, абрады, народныя рамёствы.
Фота раённага камітэта ГА «БРСМ».
