На знакамітым мемарыяле цяпер ладзіцца шмат творчых імпрэз да Года народнага адзінства. І крупчане – іх актыўныя ўдзельнікі.Выставу дэкаратыўна-прыкладной творчасці «Пад мірным небам» арганізавалі ўстановы дадатковай адукацыі Міншчыны. Наш раён прадставіў вернісаж «Беларусь – гэта мы».
– Нядаўна былі падведзены вынікі абласнога этапа рэспубліканскага конкурсу пад дэвізам «Беларусь – мая мова і песня», – расказвае дырэктар Цэнтра дзіцячай творчасці Вераніка Сяліцкая. – Ён праводзіцца адзін раз у два гады і з’яўляецца своеасаблівым падвядзеннем вынікаў дзейнасці навучэнцаў і педагогаў. На конкурс мы прадставілі 20 работ мастацкай і 20 работ дэкаратыўна-прыкладной творчасці, што прынесла нашаму раёну 13 дыпломаў. Гэтыя работы і склалі вернісаж «Беларусь – гэта мы».
Трэба сказаць, што ля экспазіцыі крупчан заўсёды было мнагалюдна, наведвальнікі цікавіліся работамі, распытвалі пра аўтараў і тэхнікі выканання твораў. А нашы педагогі дадатковай адукацыі Аксана Коваль і Ганна Кухта не толькі расказвалі, але і правялі майстар-клас па вырабу славянскай ахоўнай лялькі «Хараство».
Адмецім, што кожныя выхадныя лета на Кургане Славы будуць праходзіць тэматычныя выставы.
Іна ГАРА. Фота Крупскага ЦДТ.
