.jpg "Работы пераможцаў Міжнароднага конкурсу жывапісу і графікі «На сваёй зямлі» прывезлі ў Крупскую галерэю")
Выстава пад назвай «На сваёй зямлі» дзейнічае ў галерэі горада ў жніўні. Конкурсы... Гэта слова трывала ўвайшло ў жыццё як дзяцей, так і дарослых. Дзякуючы арганізацыі самых розных конкурсаў і шырокаму правядзенню іх у нашай краіне і за яе межамі ажыццяўляецца пошук і падтрымка таленавітых людзей.Адным з цікавых з’яўляецца Міжнародны конкурс жывапісу і графікі «На сваёй зямлі», арганізатарам якога выступіла ў 2006 годзе грамадская арганізацыя «Беларускі зялёны крыж» сумесна з Міністэрствамі культуры, адукацыі, прыродных рэсурсаў і аховы навакольнага асяроддзя Рэспублікі Беларусь. У бягучым годзе на конкурс, што прайшоў у дзясяты раз, з 34 краін свету было даслана больш за 13 тысяч работ, з іх 459 сталі лаўрэатамі конкурсу.
Работы пераможцаў Міжнароднага конкурсу жывапісу і графікі «На сваёй зямлі» выстаўляліся на розных пляцоўках г. Мінска, у тым ліку ў Нацыянальным мастацкім музеі. А сёння магчымасць пазнаёміцца з некаторымі з іх з’явілася ў крупчан і гасцей Крупшчыны.
.jpg "Работы пераможцаў Міжнароднага конкурсу жывапісу і графікі «На сваёй зямлі» прывезлі ў Крупскую галерэю")
У вялікай зале Крупскай мастацкай галерэі імя Барыса Аракчэева экспануецца 45 работ, аўтарамі якіх з’яўляюцца юныя мастакі з Беларусі, Расіі, Украіны, Арменіі, Тайланда і Балгарыі. З дапамогай алоўкаў і фламастараў, гуашы і акварэлі ўдзельнікі конкурсу перадалі на паперы любоў да родных мясцін, гонар за сваю сям’ю, выказалі жаданне жыць у міры і дружбе, аддалі свой голас за здаровы лад жыцця...
Кожная работа выставы «На сваёй зямлі» па-свойму цікавая і багатая сваім зместам, арыгінальная ў плане раскрыцця тэмы і валодання аўтарам тэхнікай мастацкага майстэрства. Кагосьці з наведвальнікаў галерэі асабліва ўражвае сюжэтная работа «Каляды» дзевяцігадовай Каці Катляровай з г. Сочы, хтосьці ў захапленні ад графічнай работы «Вулічны музыкант», аўтар якой 13-гадовая Сафія Дзічанкова з беларускага горада Гомеля, а нехта падоўгу затрымліваецца ля работ на тэму «Падарожжа». Прыемна, што сярод наведвальнікаў выставы былі і тыя, хто ўсур’ёз зацікавіўся Міжнародным конкурсам жывапісу і графікі «На сваёй зямлі» і вырашыў прыняць у ім удзел. Пажадаем ім ажыццяўлення задуманага!
.jpg "Работы пераможцаў Міжнароднага конкурсу жывапісу і графікі «На сваёй зямлі» прывезлі ў Крупскую галерэю")
Яркія ўражанні і незабыўныя сустрэчы з цудоўнымі работамі юных мастакоў свету, а таксама завочныя падарожжы па нашай планеце Зямля чакаюць усіх, хто наведае ў жніўні выставу «На сваёй зямлі». З новымі работамі лаўрэатаў і дыпламантаў Міжнароднага конкурсу жывапісу і графікі можна пазнаёміцца ў верасні на выставе «Свет вачыма дзяцей».
Галерэя чакае сваіх наведвальнікаў. А ў верасні яе наведвальнікаў чакае «Свет вачыма дзяцей».
Таццяна БОНДАР,
навуковы супрацоўнік Крупскай мастацкай галерэі імя Барыса Аракчэева.
