З вопыту ведаю, што падарожжы ў Полацк становяцца для дзяцей самымі любімымі, і потым яны зноў і зноў вяртаюцца ў гэты цудоўны горад. Таму літаральна кожны год я прапаноўваю вучням накіравацца туды, мы едзем, падарожнічаем і вяртаемся духоўна ўзбагачанымі і натхнёнымі. Зямля пад белымі крыламі… Так паэтычна назваў наш край Уладзімір Караткевіч. І сапраўды, не перастаеш здзіўляцца і захапляцца краявідамі роднай Бацькаўшчыны. Напэўна, гэта Еўфрасіння Полацкая, нябесная заступніца Беларусі, з любоўю і пяшчотай ахоўвае нас. Аднойчы пабываўшы на святой полацкай зямлі, назаўсёды ў сэрцы захоўваеш адчуванне чагосьці светлага, добрага і вялікага.
Вось і зараз горад апраўдаў нашы спадзяванні. Нам пашанцавала, бо экскурсію вяла сапраўдны прафесіянал, жанчына, улюбёная ў свой горад. І гэта перадалося нам. Яна правяла нас па ўтульных, цяністых вулачках, расказала шмат цікавага пра Полацк, яго гісторыю і знакамітых людзей. Мы пабывалі ля помнікаў Вітаўту, Еўфрасінні Полацкай, Францыску Скарыне, Сімяону Полацкаму. І нават змаглі ўбачыць адзіны ў краіне помнік літары «Ў».
Мы з захапленнем слухалі экскурсавода. Полацк – самы старажытны горад, гэта калыска беларускай дзяржаўнасці, цэнтр духоўнасці і культуры, радзіма славутых беларускіх асветнікаў. На гэтай старажытнай зямлі была заснавана першая вышэйшая навучальная ўстанова – Полацкі езуіцкі калегіум, зараз Полацкі дзяржаўны ўніверсітэт. Над горадам магутна ўзвышаецца Сафійскі сабор, побач – Барысаў камень, дзе можна загадаць сваё самае запаветнае жаданне, і яно павінна збыцца. Не пакідае абыякавым і Спаса-Еўфрасіннеўскі манастыр, на тэрыторыі якога для нас таксама была праведзена цікавая і змястоўная экскурсія.
У той дзень мы сапраўды дакрануліся да гісторыі свайго краю. Гэта вельмі ўразіла. Вучні нашай школы актыўна ўдзельнічаюць у рэспубліканскай акцыі «Жыву ў Беларусі і тым ганаруся». Яны падарожнічаюць, вывучаюць свой край, каб не толькі па кнігах, а на свае вочы ўбачыць, якая багатая гісторыя і культура нашай краіны, каб адчуць гэта сваім сэрцам.
Аксана БЯЛАЎСКАЯ, настаўніца беларускай мовы і літаратуры сярэдняй школы № 1 імя У.М. Марцынкевіча г. Крупкі.
