.JPG)
Стан навакольнага асяроддзя, пытанні экалагічнай бяспекі сёння хвалююць не толькі эколагаў і шчырых аматараў прыроды. Усё часцей на глабальныя экалагічныя праблемы звяртае пільную ўвагу грамадскасць, у многіх людзей з’яўляецца асэнсаванне асабістай адказнасці за свае дзеянні ў адносінах да прыроды. Сёння мы павядзем размову аб уборцы прыбярэжнай паласы возера Сялява на тэрыторыі заказніка рэспубліканскага значэння «Сялява», зоны адпачынку «Панская купальня», экалагічнай сцяжыны «Прошыцкія балоты».– Менавіта на навядзенне парадку на гэтых аб’ектах нам было ўказана ў абласным плане мерапрыемстваў па правядзенні месячніка па добраўпарадкаванні тэрыторый, які пачаўся 15 кастрычніка, – расказваў дырэктар заказніка рэспубліканскага значэння «Сялява» Сяргей Мазнёў. – Абумоўлены і тэрміны выканання – да 15 лістапада. Але мы не чакаем вызначанай даты, а перыядычна праводзім суботнікі па ачыстцы прыбярэжнай зоны возера, якая замацавана за намі. Як вядома, жамчужына Крупшчыны прыцягвае турыстаў і рыбакоў з многіх рэгіёнаў Беларусі не толькі ўлетку, але амаль круглы год. На вялікі жаль, асобныя з іх пакідаюць пасля сябе пластыкавыя бутэлькі з-пад газіраванай вады, металічныя – з-пад піва, розныя пакеты і ўпакоўкі ад ёгуртаў, сухарыкаў, семак, не кажучы ўжо пра абгорткі ад цукерак, марожанага, чыпсаў. А ўсё гэта даводзіцца ўручную ўбіраць нам. Той жа, хто гэта робіць, проста не задумваецца аб наступствах.
Упэўнены, што ўвагу тых, хто ўязджае ў вёску Прошыка, а менавіта адсюль і пачынаецца возера, прыцягваюць назіральная вышка, альтанкі, пірс. Усё гэта зроблена ў рамках абуладкавання экалагічнай сцяжыны «Прошыцкія балоты» працягласцю 6 кіламетраў: 1 кіламетр па сушы і 5 кіламетраў па вадзе.
– Экалагічная сцяжына, выкладзеная драўлянымі кругляшамі, пралягае праз лясны масіў па правым баку возера, – працягваў расказваць дырэктар заказніка. – Праходзячы па ёй, можна ўбачыць «бабровую хатку», крыніцу, абсталяваную ў выглядзе калодзежа. Любы жадаючы можа набраць крынічнай вады, для чаго нашымі работнікамі зроблен «журавель» з вядром. Вось і ў прайшоўшую суботу разам з прадстаўнікамі раённай інспекцыі прыродных рэсурсаў і аховы навакольнага асяроддзя была праведзена ўборка экалагічнай сцяжыны, прыбярэжнай паласы возера Сялява, дзе знаходзіцца наша арганізацыя, а таксама зоны адпачынку «Панская купальня».
Да месца адзначыць, што для адпачываючых, рыбаловаў, нават тых, хто прыязджае на «Панскую купальню» на некалькі гадзін, тут створаны ўсе ўмовы: абсталяваны стаянкі аўтатранспарту, устаноўлены інфармацыйныя стэнды, дастаткова альтанак, спецыяльных месцаў для развядзення вогнішча, ёсць указальнікі і, бясспрэчна, кантэйнеры для збору цвёрдых бытавых адходаў. Вось тут і даводзіцца канстатаваць, што не-не, ды і знаходзяцца такія, што не даносяць смецце да гэтых кантэйнераў, а пакідаюць яго на тым месцы, дзе адпачывалі, або могуць занесці пакет з адходамі проста ў лес – ён жа побач. Прыбіраць за такімі зноў жа прыходзіцца адказным за дадзеную зону адпачынку.
Хацелася б, каб кожны задумаўся над тым, што смеціць нельга. Быць сапраўдным гаспадаром сваёй зямлі – справа гонару кожнага. Давайце жыць у гармоніі з прыродай.
