У сучаснасці з’яўляюцца новыя імёны і фільмы, якія паспяхова карыстаюцца папулярнасцю ў гледачоў і прымаюць удзел у знакамітых кінафорумах.
Прагляд добрага кіно – выдатны адпачынак ад штодзённых клопатаў. Памятую, як у гады майго дзяцінства сеансы фільмаў збіралі поўныя кіназалы. Вядома, што ў наш час, калі ў кожнага дома ёсць інтэрнэт, гэтым ужо не здзівіць – любы фільм можна паглядзець у любы зручны час. Але ўсё ж такі атмасферу кінатэатра нічым не заменіш. Да таго ж у кінатэатры вялікі экран, які ўсё роўна больш за любы тэлевізар. У кінатэатры выдатны гук са спецэфектамі, якія дазваляюць больш паглыбіцца ў сюжэт. Здаецца, што машына з экрана праязджае каля цябе побач.
Можна многа гаварыць пра станоўчыя бакі прагляду фільма ў кіназале. А што прапаноўвае гледачам кінатэатр «Кастрычнік» горада Крупкі, мы распыталі ў начальніка аддзела па кінавідэаабслугоўванню насельніцтва Крупскага раёна Іны Сакалоўскай.
– Яшчэ 2-3 гады назад папулярнасцю ў гледачоў карысталіся замежныя фільмы-фэнтэзі, фантастыка, – расказвае Іна Анатольеўна. – За апошні год усё больш ідуць гледачы на беларускія і расійскія фільмы. Да юбілейнай даты кінематографа з пачатку года ў кінатэатры ідзе дэманстрацыя фільмаў мінулых гадоў – «Дзяржаўная граніца», «Вам – заданне», «Несцерка», «Міравы хлопец», «Мама, я жывы». Да 100-годдзя беларускага кіно з 5 снежня для арганізаваных гледачоў дэманструецца агульнарэспубліканская трылогія, якая складаецца з фільмаў «Дэманстратар», «Трэст, які не лопнуў», «Залатая эпоха Беларусьфільма». Гэта тры дакументальныя фільмы, якія паказваюць асноўныя перыяды развіцця беларускага кінематографа. З 12 снежня на экраны выйшаў фільм «Чорны замак». Юным гледачам падабаецца анімацыйны беларускі 3D-фільм «Песня Сірын», які быў выпушчаны да кінафестывалю «Лістапад». Шмат добрых водгукаў атрымалі фільмы «Культурны код», «Час вярнуцца». Трэба адзначыць, што ствараюцца цікавыя дакументальныя фільмы. І дарослым, і дзецям падабаецца мультыплікацыйны фільм «Сімвалы маёй краіны». У ім для дзяцей на зразумелай мове тлумачацца значэнні дзяржаўных сімвалаў і дзяржаўных свят краіны. Перад сеансам паказваем фільмы-пяціхвілінкі з серыі «Гонар нашай краіны» – «Нацыянальная бібліятэка», «Музей Вялікай Айчыннай вайны», «Драматычны тэатр» і іншыя фільмы патрыятычнай накіраванасці. Шмат такіх фільмаў на экалагічную тэму – «Бярэзінскі біясферны запаведнік», «Запаведныя галасы», «Белавежская пушча».
Дарэчы, зала кінатэатра «Кастрычнік» абсталявана гукаўзнаўляльнай сістэмай «Dolby», сучасным лічбавым кінапраектарам. За 11 месяцаў гэтага года 16 тысяч гледачоў пабывалі на сеансах.
