Упершыню такі абласны пленэр прайшоў у 2014 го-дзе. І нам прыемна, што ў Год культуры гэта падзея адбываецца менавіта ў Крупскім раёне. Пленэр з’яўляецца знакавым яшчэ і таму, што прысвечаны 90-годдзю з дня нараджэння заслужанага дзеяча мастацтваў Беларусі Барыса Аракчэева, чыё імя носіць мастацкая галерэя нашага горада.
Гасцінна вітаў удзельнікаў пленэра ад імя старшыні райвыканкама Ігара Часнака, ад сябе асабіста намеснік старшыні Андрэй Вараб’ёў. «Крупшчына багатая традыцыямі, прыгажо-сцю, добрымі людзьмі, яна здольна натхніць кожнага, хто тут пабываў. Мы ганарымся, што творчы шлях Барыса Аракчэева звязаны і з нашым раёнам. Вельмі прыемна, што ў Крупкі прыехалі цудоўныя творцы, і я ўпэўнены, што тыя скульптуры, якія будуць створаны рукамі гэтых таленавітых людзей, стануць годным упрыгажэннем нашага горада. Вітаю Аксану Барысаўну і Алёну Барысаўну Аракчэевых, якія не забываюць наш горад, прыязджаюць на выставы і творчыя сустрэчы, пакідаюць у дар свае мастацкія творы. Спадзяюся, што супрацоўніцтва будзе толькі ўмацоўвацца. А нашым шаноўным скульптарам – творчых поспехаў», – пажадаў Андрэй Вараб’ёў.
Народны мастак Беларусі, лаўрэат Дзяржаўнай прэміі СССР, старшыня Мінскага абласнога мастацка-экспертнага савета па манументальным і манументальна-дэкаратыўным мастацтве Іван Міско назваў пленэр сапраўдным святам. «Я рады, што сёння разам з вамі. У крупчан ёсць унікальная магчымасць прыйсці і пагля-дзець, як працуюць сапраўдныя майстры, як датыкаюцца да камня, як з ім размаўляюць, якая ў іх узаемная любоў. Аўтарскаму калектыву зычу творчага плёну», – сказаў ён. А яшчэ Іван Якімавіч перадаў Аксане Аракчэевай унікальныя фотаздымкі, якія зрабіў асабіста яшчэ ў 1960 годзе. Чым расчуліў не толькі Аксану, але і ўсіх прысутных.
А яна тым часам таксама была з падарункамі і ўручыла ганаровым гасцям каталогі з фотаздымкамі карцін бацькі.
На свяце было шмат гасцей, гаварылі яны вельмі шчыра і натхнёна. «Я бяру камень і адсякаю ўсё лішняе», – знакаміты беларускі скульптар Генадзь Буралкін нагадаў, што так некалі адказаў на пытанне пра стварэнне каменных шэдэўраў Мікеланджэла. Сціпла, як усе вялікія. Але для таго, каб узнік сапраўды годны твор, нешта асаблівае, дадзенае звыш, павінна быць у руках, у душы, у сэрцы майстра. Гэта лёс выбраных.
На самым эмацыянальным піку сустрэчы ўся ўвага была скіравана на тых людзей, чыім талентам будуць ажываць камяні. Гасцям прадставілі скульптараў, іх віталі апладысментамі. Адразу бачна – сапраўдныя майстры. Яны выглядалі вельмі сабранымі, засяроджанымі, і, здаецца, у думках былі ўжо ў сваёй творчасці.
Ад імя аўтарскага калектыву словы сказаў вядомы беларускі скульптар Ігар Засімовіч: «Дзякуй за тое, што запрасілі нас на пленэр, дзякуй за сустрэчу. Мы будзем старацца вам адпавядаць і зрабіць прыемныя падарункі для горада, каб яны ўпрыгожвалі вашы мясціны. Ну, а тое, што камяні нас натхняюць – гэта так і ёсць. Я працую з імі ўжо амаль 30 гадоў, гэта заўсёды непаўторная крыніца натхнення. Кожны камень мае сваё – свой твар, сваю душу, сваё нешта прыцягальнае. Будзем старацца, каб праз нашы працы і вы змаглі гэта адчуць».
Адкрыццё пленэра прайшло па-сяброўску і цёпла. Цікавым быў і завяршальны акцэнт. Па традыцыі нашага крупскага музея гасцей запрасілі дастаць са старадаўняга чароўнага збаночка каляровыя стужачкі, што ўяўляюць сабой сімвалы зямлі, і завязаць на бярозку з добрымі думкамі, памкненнямі і пажаданнямі.
Урачыстая частка скончылася, і майстры накіраваліся на пляцоўку, дзе іх чакалі камяні, у якіх наперадзе – сапраўднае пераўтварэнне. Трэба сказаць, што пляцоўку для такой сур’ёзнай і маштабнай работы прадаставіла ААТ «Крупскі райаграсервіс». Менавіта на яго базе цэлыя тры тыдні і будуць тварыць скульптары.
Увогуле пленэр па вырабу дэкаратыўных скульптур з камня для нашага раёна – з’ява. Думаецца, што не толькі для нашага. І ад гэтага яшчэ больш ганарова, што ён адбываецца менавіта на Крупшчыне.
Намеснік дырэктара Мінскага абласнога цэнтра народнай творчасці Наталля Даўнаровіч расказала, што самае напасрэднае дачыненне да ідэі і матэрыяльнай падтрымкі пленэра мае старшыня Мінскага аблвыканкама Сямён Шапіра. «Міншчына можа ганарыцца тым, што ў яе фестывальным календары больш за 30 буйных творчых праектаў самага рознага накірунку і ўзроўню, – паведаміла Наталля Даўнаровіч. – Яны сталі традыцыйнымі, большасць мае гісторыю ў некалькі дзесяцігоддзяў. А вось гэты пленэр – справа маладая. Цудоўна, што такое грандыёзнае творчае свята па ўзору іншых будзе мабільным, і тыя шэдэўры, што ствараюць майстры са звычайных камянёў, упрыгожаць і іншыя гарады».
