У Крупскай мастацкай галерэі імя Барыса Аракчэева адбылася прэзентацыя кнігі Тамары Бунта «Дзяўчынка з Вішнёвага завулка» і адкрыццё выставы, якая будзе доўжыцца да 15 студзеня.Вядучая сустрэчы, навуковы супрацоўнік музея Ала Сасіна адзначыла, што ў Год культуры мастацкую галерэю і гісторыка-краязнаўчы музей наведалі больш 10 тысяч чалавек, было падрыхтавана і праведзена 90 цікавых культурных і пазнавальных мерапрыемстваў, урачыста адкрыта 36 выстаў як мясцовых, так і вядомых беларускіх мастакоў. І сустрэча, якая праходзіла 25 лістапада, стала адным з завяршальных мерапрыемстваў, прымеркаваных да Года культуры.
На сустрэчу прыехалі Аксана Аракчэева – мастак, член Беларускага саюза мастакоў, дыпламант ЮНЕСКА, лаўрэат прэміі Васіля Віткі, член сям’і дынастыі Аракчэевых; Ксенія Сяліцкая-Ткачова – мастацтвазнаўца, магістр культуралогіі, член Беларускага саюза мастакоў, куратар праекта «Аракчэевы. Творчая дынастыя»; Тамара Бунта – вядомы журналіст і дзіцячы пісьменнік, член Саюза пісьменнікаў Беларусі, член прэзідыума Беларускага саюза жанчын; Марына Шупо – творчы чалавек, сёлета выйшла яе першая кніга, ілюстрацыі да якой можна ўбачыць у раённым музеі. І далей у сваіх выступленнях яны шчыра і сардэчна віталі юных крупчан, якія прысутнічалі ў зале, расказвалі аб сваім творчым шляху, абяцалі падарыць кнігі раённай бібліятэцы, жадалі хлопчыкам і дзяўчынкам дабівацца ўсяго задуманага.
Завяршаецца Год культуры. Адметна тое, што пачынаўся ён з праекта Аксаны Аракчэевай «Мастацкія традыцыі: калі прырода твой настаўнік», прысвечанага 90-годдзю з дня нараджэння Барыса Аракчэева, і завяршаецца Год культуры таксама праектам Аксаны Барысаўны.
Затым увагу ўсіх прысутных скіравала на сябе аўтар кнігі «Дзяўчынка з Вішнёвага завулка» Тамара Бунта, якая працавала ў розных беларускіх выданнях, больш дзесяці гадоў была рэдактарам жаночага часопіса «Алеся», аўтар шматлікіх артыкулаў, прысвечаных тэме дзяцінства, мацярынства, грамадскай дзейнасці жанчын. Тамара Бунта – стваральнік цыкла сямейных гісторый «Вядомыя людзі Беларусі вачыма родных і блізкіх». Узнагароджана знакам «Выдатнік друку Беларусі».
Яе кніга «Дзяўчынка з Вішнёвага завулка» – гэта зборнік апавяданняў для дзяцей, які складаецца з 15 аповядаў на беларускай мове, у якіх аўтар успамінае вясёлыя і сумныя гісторыі свайго дзяцінства. У 2014 годзе рукапіс кнігі Тамары Бунта атрымаў 2-ю прэмію ў літаратурным конкурсе грамадскага аб’яднання Саюза пісьменнікаў Беларусі ў намінацыі «Дзіцячая літаратура».
І, вядома, ніхто, акрамя самога аўтара, не раскажа нам пра кнігу і аб сабе лепш, чым ён сам. І Тамара Бунта гаварыла аб тым, як яна пісала свае апавяданні, што гэта яе другая кніга, што цудоўныя малюнкі да кнігі «Дзяўчынка з Вішнёвага завулка» зрабіла Аксана Аракчэева. Каб хлопчыкі і дзяўчынкі запомнілі і аўтара, і мастака, яны некалькі разоў гучна паўтарылі іх прозвішчы. Тут жа Тамара Пятроўна правяла літаратурную віктарыну і засталася задаволена веданнем вучнямі беларускіх твораў і іх аўтараў. Дарэчы, ужо ў трэцім класе для пазакласнага чытання рэкамендавана апавяданне Тамары Бунта «Далонькі з пушынкамі». Вельмі артыстычна, эмацыянальна, з каментарыямі асобных момантаў прачытала аўтар сваё апавяданне «Шкілет», паказала вельмі яркія і трапныя малюнкі да кожнага з апавяданняў.
Усе засталіся ў захапленні ад прадэманстраванага невялікага відэасюжэта аб тым, як Аксана Аракчэева прыдумвае ілюстрацыі да дзіцячых кніг. Дырэктар раённага гісторыка-краязнаўчага музея Тамара Бальбот падзякавала гасцей за чарговы візіт на Крупшчыну, з упэўненасцю адзначыла, што і сённяшняя сустрэча з людзьмі мастацтва і культуры, як і многія папярэднія, абавязкова пакіне свой след. Напрыканцы ўсім школьнікам, якія прыйшлі на прэзентацыю кнігі, былі раздадзены салодкія падарункі ад Аксаны Аракчэевай.
