У гэтыя дні ў нашай сталіцы працуе ХХІV Мінская міжнародная кніжная выстава-кірмаш. Цэнтральны стэнд яе ўпрыгожваюць класікі-юбіляры гэтага года Янка Купала, Янка Брыль і Максім Танк. А галоўны юбілей, пад знакам якога праходзіць форум, – 500-годдзе беларускага кнігадрукавання. Менавіта гэтай адметнай даце прысвечана і выстава, адкрытая ў Крупскай цэнтральнай раённай бібліятэцы імя Янкі Купалы.Супрацоўнікі бібліятэкі выбралі са сваіх фондаў самае цікавае. Так, чытачы ўбачаць эскпазіцыю, прысвечаную нашым славутым першаасветнікам, – «Францыск Скарына і яго эпоха». Там змешчаны кнігі «Францыск Скарына», «Асветнікі Беларусі», «Симеон Полоцкий», «Гісторыя беларускай крыўскай кнігі». Цэнтральную частку займаюць выданні «Кніжная спадчына Беларусі», «Полацк. Гонар вякоў», «Из прошлого в будущее», «Гісторыя беларускай кнігі», «Беларусь. Краіна і людзі». Проста нельга не абысці ўвагай раздзел «Землякі – майстры слова», дзе падрыхтаваны творы Міхася Калачынскага, Васіля Зуёнка, Змітрака Марозава, Алены Якаўлевай, Барыса Макарэвіча і іншых нашых літаратараў.
Першымі наведвальнікамі гэтай выставы сталі вучаніцы 4 класаў раённай гімназіі і СШ № 3 г. Крупкі, якія завіталі ў дзіцячую бібліятэку, каб абмяняць кнігі. Бібліятэкар Алена Мазгова, выдаўшы ім на абанеменце патрэбную літаратуру, запрасіла пазнаёміцца з новай экспазіцыяй, з творамі беларускіх класікаў, расказала аб Мінскай міжнароднай кніжнай выставе-кірмашы, падказала навінкі кнігадруку.
Дарэчы, у Крупскай дзіцячай бібліятэцы на пачатак года налічваецца 17 тысяч 251 экзэмпляр кніг, сюды прыходзяць 34 назвы часопісаў і 22 назвы газет.
– З нагоды 500-годдзя беларускага кнігадрукавання супрацоўнікі аддзела бібліятэчнага маркетынгу распрацавалі план мерапрыемстваў Крупскай РЦБС на ўвесь год, – адзначыла дырэктар Наталля Купрыянава. – На працягу года ў бібліятэках раёна будзе арганізаваны цыкл кніжных выстаў: «Францыск Скарына – асветнік-першадрукар», «Мова народа – яго святыня», «Слова Скарыны ў сучасным свеце», «Вялікі сын Беларусі – Францыск Скарына», «Да вытокаў першапісьменства», «Шлях да друкаванага слова» і іншыя. Запланаваны цыкл гутарак: «Гісторыя беларускага кнігадрукавання: ад «Псалтыра» Ф. Скарыны да міжнародных кніжных выстаў», «Першая кніга на беларускай мове», «Прыгарніся да роднага слова». Дэкада праваслаўнай літаратуры «Духоўная кніга – крыніца вялікай мудрасці» і прагляд навінак беларускай літаратуры «Чараўнік роднага слова» пройдуць у Халопеніцкай гарпасялковай бібліятэцы, інфармацыйная гадзіна «Жыццё і дзейнасць Францыска Скарыны» – ва Ухвальскай, Узнацкай, Каласоўскай і Абчугскай, свята краязнаўчай кнігі «Скарынаву кнігу ў вечнасць пусціць» – у Бобрскай і Крупскай бібліятэках, гістарычны экскурс «Францыск Скарына: беларускае кнігадрукаванне праз прызму часу» – у Крупскай сельскай бібліятэцы і шмат чаго іншага.
Як бачым, запланавана шмат цікавых падарожжаў па кніжным свеце. Запрашаем да іх далучыцца.
