У бягучым годзе спаўняецца 135 гадоў з дня нараджэння народных паэтаў Беларусі Янкі Купалы і Якуба Коласа. З гэтай нагоды ў музеі арганізавана выстава “Чалавек-эпоха”, якую прадставіў Дзяржаўны літаратурна-мемарыяльны музей Якуба Коласа.Янка Купала і Якуб Колас – прызнаныя ва ўсім свеце майстры роднага слова, сыны беларускага народа, якія выказвалі яго думы, клапаціліся пра лёс нашай мовы, пра шчасце Беларусі, сталі заснавальнікамі беларускай літаратурнай мовы, а ў гады Вялікай Айчыннай вайны заклікалі мужна змагацца з ворагам, абараняць Радзіму.
Якуб Колас пісаў:
О, як бы я хацеў спачатку
Дарогу жыцця па парадку
Прайсці яшчэ раз, азірнуцца,
..............................
К вясне б маёй хацеў вярнуцца.
А жыццёвая дарога Якуба Коласа прыводзіла яго і ў нашы мясціны. У 1908 г. ён працаваў настаўнікам у прыватнай школе ў вёсцы Сані (цяпер гэта Талачынскі раён Віцебскай вобласці), а здаваць экзамены прывозіў сваіх вучняў у вёску Абчуга.
Сёння ў Крупскім гісторыка-краязнаўчым музеі можна ўбачыць друкаваныя выданні, кнігі Якуба Коласа, аўтабіяграфічную паэму ў вершах “Новая зямля”, якой няма роўных у беларускай паэзіі па багаццю мовы. Ёсць тут і аўтографы пісьменніка, пісьмы, першы надрукаваны верш, фотаздымкі розных гадоў, на якіх адлюстраваны цікавыя моманты напружанага жыцця пісьменніка, яго падарожжаў і сустрэч. Прадстаўлены партрэты яго бацькоў, жонкі, сыноў, унукаў. Таксама экспануюцца каляровыя здымкі з залаў літаратурна-мемарыяльнага музея Якуба Коласа, сядзіб Акінчыцы, Альбуць, што на радзіме паэта, у Стаўбцоўскім раёне Мінскай вобласці, і многае іншае.
Вы яшчэ раз прыгадаеце знаёмыя са школьнай парты радкі паэта:
Малюнкі родныя і з'явы!
Як вы мне любы, як цікавы!
Як часта мілай чарадою
Вы ўстаяце перада мною!
Для вучняў у нашым музеі падрыхтаваны спецыяльныя музейныя ўрокі па творчасці Якуба Коласа.
Выстава будзе доўжыцца да 13 мая. Прыходзьце на сустрэчу з класікай, якая заўсёды актуальная, надзённая, і абавязкова ўзбагаціць ваш унутраны свет нечым новым.
Таццяна КАВАЛЕНКА, супрацоўнік Крупскага гісторыка-краязнаўчага музея.
