І адразу варта заўважыць, што аўдыторыя аказалася дастаткова шматлікай. У прыватнасці, у 1-й узроставай катэгорыі, а гэта пачатковыя класы, удзел прынялі 26 вучняў, у 2-й (5-6 класы) – 18, у 3-й (7-8 класы) – 19 і ў 4-й узроставай катэгорыі, у якую ўваходзілі вучні 9-10 класаў, было 14 удзельнікаў. Нялёгка прыйшлося журы конкурсу, якое ацэньвала выступленні ўдзельнікаў па наступных крытэрыях: глыбіня пранікнення ў вобраз і сэнс твора; выбар тэксту твора; артыстызм выканання.
Аўтар гэтых радкоў прысутнічала ў класе, дзе вершы чыталі вучні 7-8 класаў з Ухвальскай, Халопеніцкай, Абчугскай, Бобрскай, Нацкай, Хацюхоўскай, Каласоўскай сярэдніх школ, раённай гімназіі, СШ № 1 і № 3 г. Крупкі, СШ пасёлка Крупскага. Тэматыка, як адзначалася вышэй, была скарынаўская, таму і назвы твораў гаварылі самі за сябе: «Францыск Скарына» Юрася Свіркі, «Мара Скарыны» Ніла Гілевіча, «Кантрабанда» Янкі Сіпакова, «Скарына пакідае Радзіму» Уладзіміра Караткевіча, «Гравюры Скарыны» Максіма Танка, «Партрэт Скарыны ў Падуі» Генадзя Пашкова, «Напісанае застаецца» Алеся Петрашкевіча, «Беларусь» Петруся Броўкі, «Скарынаўскае свята» Надзеі Ярмак, «На зямлі, дзе іскрыцца Дзвіна...» Анатоля Канапелькі і многія іншыя.
Хваляванне чытальнікаў было відавочным. Члены журы ўважліва іх слухалі, сачылі за артыстызмам выканання, рабілі паметкі ў блакноты, а пасля выступлення апошняга вучня гэтай узроставай катэгорыі падвялі вынікі і вызначылі пераможцаў, прозвішчы якіх затым былі агучаны ў прысутнасці ўсіх удзельнікаў раённага этапа рэспубліканскага конкурсу.
Падчас цырымоніі ўзнагароджвання слова ўзяла член абласнога аддзялення Саюза пісьменнікаў Беларусі, галоўны рэдактар газеты «Пухавіцкія навіны» Вольга Савасцюк, якая, дарэчы, была старшынёй журы 4-й узроставай катэгорыі:
– Прыемным стала тое, што гэта аказаўся не конкурс, а самае сапраўднае свята. Адчувалася, што вы ўсе добра падрыхтаваліся, выбралі цудоўныя творы, паказалі, што любіце і ведаеце беларускую мову, прапусцілі праз сябе тыя вершы, якія вывучылі і цудоўна прадэкламавалі. Я рада павіншаваць пераможцаў і ўручыць Дыпломы ІІІ, ІІ і І ступеняў вучням 9-10 класаў 4-й узроставай катэгорыі.
Затым, перш чым узнагародзіць пераможцаў наступных узроставых катэгорый, да прысутных звярнулася намеснік начальніка аддзела адукацыі, спорту і турызму райвыканкама Таццяна Галоўкіна, якая таксама адзначыла, што сёння ў зале сабраліся тыя, хто любіць, шануе і ведае нашу родную мову. Тут жа намінантам усіх узроставых катэгорый былі ўручаны Дыпломы розных ступеняў.
А вось прозвішчы тых пераможцаў раённага этапа, хто паедзе на абласны этап рэспубліканскага конкурсу, які адбудзецца на базе Мінскага абласнога інстытута развіцця адукацыі. Гэта – Аляксей Навіцкі з СШ пасёлка Крупскага (1-я ўзроставая катэгорыя); Дар’я Самойленка з Каласоўскай СШ (2-я ўзроставая катэгорыя); Уладзіслава Самахвал з СШ № 3 г. Крупкі (3-я ўзроставая катэгорыя) і Павел Папаўян з Крупскай раённай гімназіі (4-я ўзроставая катэгорыя).
