Афіцыйнае адкрыццё і ўрачыстае шэсце, прысвечанае 1155-годдзю Полацка і 500-годдзю беларускага кнігадрукавання, праходзіць у самым старажытным горадзе краіны сёння, 2 верасня. Але ўжо ў сераду свята распачало свой шлях Рэспубліканскай навукова-асветніцкай экспедыцыяй «Дарога да святыняў», якая нясе з сабой Дабратворны Агонь, запалены каля Гроба Гасподняга.Як у кожны з дваццаці трох папярэдніх гадоў, экспедыцыя будзе шырока распаўсюджваць веды пра гісторыю Беларусі і яе праваслаўнай царквы, праводзіць творчыя сустрэчы ў сценах устаноў культуры і адукацыі, наведваць бальніцы, сацыяльныя прытулкі, праводзіць памінальнае набажэнства на месцах пахавання абаронцаў Айчыны. Разам з жыхарамі гарадоў і вёсак паломнікі будуць садзіць дрэўцы агульнага саду Малітвы. Экспедыцыя пройдзе праз Баранавіцкі, Воранаўскі, Астравецкі, Докшыцкі, Лепельскі і Ушацкі раёны. Месцам завяршэння пяцідзённага паломніцтва па традыцыі стане сталіца Дня беларускага пісьменства.
Полацк чакае адзін з рарытэтаў, які мае непасрэднае дачыненне да знакамітага беларускага першадрукара. Арыгінал «Малой падарожнай кніжкі», выдадзены ў 1522 годзе, набыты Белгазпрамбанкам. Гэта першы і адзіны ў Беларусі экзэмпляр гэтага выдання асветніка. Ён прывезены з Вільнюса ўжо і выстаўлены ў экспазіцыі Музея беларускага кнігадрукавання, але афіцыйна будзе прэзентаваны сёння.
Дарэчы, у музеі абноўлены экспазіцыі, заменена частка экспанатаў на больш цікавыя і прэзентабельныя, а новы інфармацыйны тэрмінал дазволіць не толькі ўбачыць пад шклом, але і пагартаць віртуальную копію 3-й Кнігі царстваў, выдадзеную Францыскам Скарынам у Празе. Сёння тут адбудзецца адкрыццё выставы псалтыроў з музейных і кніжных збораў – з фондаў Полацкага гісторыка-культурнага музея-запаведніка, а таксама Цэнтральнай навуковай бібліятэкі імя Якуба Коласа Нацыянальнай акадэміі навук Беларусі. Госці ўбачаць каля 15 асобнікаў рэдкіх кніг, выдадзеных з ХVІ па ХХ стагоддзе.
Адным з самых вялікіх падарункаў гораду сталася абноўленая кнігарня «Светач-Полацк», якая зусім нядаўна зноў адчыніла дзверы для наведвальнікаў. І ў дні правядзення свята яна будзе працаваць у рэжыме, суаднесеным з праграмай святкавання.
Каля Сафійскага сабора ўжо ўстаноўлены новы помнік «Полацк – калыска беларускай дзяржаўнасці». На сімвалічных шчытах – вобразы шасці асоб – пантэон тых людзей, з якіх пачалася наша незалежная дзяржава.
Праграма свята ўключае каля васьмі дзясяткаў імпрэз. А разынкай яго стане касцюміраванае шэсце з удзелам тэатра жывых фігур эпохі Францыска Скарыны. На вуліцах горада прагуляюцца замежныя купцы, прадстаўнікі сельскай гаспадаркі, гандляркі – усяго больш за 80 персанажаў. Наогул, упершыню за гісторыю правядзення Дня беларускага пісьменства свята ў Полацку будзе доўжыцца тры дні, і горад не памятае такіх маштабных мерапрыемстваў. Сталіца самай першай беларускай дзяржавы мяркуе стаць сапраўдным цэнтрам кніжнасці і культуры.
