І зроблена гэта згодна плана. Тры гады запар возера Сялява зарыбляецца шчупаком. Напачатку былі вызначаныя месцы ля вёскі Дубы, затым ля Калодніцы, Клішана, а на гэты раз ля вёскі Худава.Разам з дзяржаўным інспектарам Барысаўскай міжраённай інспекцыі аховы жывёльнага і расліннага свету Уладзімірам Каралём (на здымку на першым плане) мы накіроўваемся ў вёску Худава, якая раскінулася ўздоўж возера Сялява. Па дарозе размова вялася пра гэта прыгожае люстэрка Крупшчыны, якое займае плошчу 1 500 гектараў, пра арганізацыі, якія адказваюць за добраўпарадкаванне вадаёма, а гэта, у прыватнасці, Крупскі лясгас, ААТ «Кляновічы», аддзел фізкультуры, спорту і турызму райвыканкама і заказнік рэспубліканскага значэння «Сялява».
– На гэты раз заказнікам рыбгаса «Волма» закуплена 1 тона 257 кілаграмаў шчупакоў, – расказваў Уладзімір Віктаравіч. – Каб не быць галаслоўным, адзначу, што Сялява зарыблялася ўжо неаднойчы – раней бралі сяголеткаў у Любані, Новалукомлі, у Чэрвені.
І гэта пацвердзіў затым дырэктар заказніка Сяргей Мазнёў, які якраз пад’ехаў да таго месца, дзе планавалася выпусціць рыбу.
– Сёння з рыбгаса «Волма» прывезена 3 тысячы 592 шчупакі сяголеткі, сярэдняя вага кожнага – 350 грамаў. Як вядома, шчупак і судак – рыба далікатная, – заўважыў Сяргей Васільевіч. – Ужо вясной шчупак пойдзе на нераст і з’явіцца патомства. Мы заўсёды імкнемся дастаўляць радасць рыбакам, таму перыядычна і праводзім зарыбленне.
Цікава было глядзець, як з рукава, які быў прымацаваны да бочкі з рыбай, шчупакі трапляюць у сваю стыхію. Дарэчы, за гэтым дзеяннем назіралі не толькі адказныя за зарыбленне, а гэта, акрамя названых раней, яшчэ і прадстаўнікі раённай інспекцыі прыродных рэсурсаў і аховы навакольнага асяроддзя, але і мясцовыя жыхары. Сапраўдныя рыбаловы-аматары ўяўлялі, якім будзе сённяшні шчупак праз пару гадоў, падказвалі адзін аднаму, на якую нажыўку яго лавіць, чым падкормліваць. Успаміналі розныя выпадкі, нагадвалі, якім быў самы важкі ўлоў, а калі наогул не клявала. Многія рабілі фота на памяць.
Пасля таго, як уся рыба аказалася ў возеры, надышоў самы адказны момант – падпісанне акта прыёмкі-здачы. І зрабілі гэта дырэктар рэспубліканскага заказніка «Сялява» Сяргей Мазнёў, начальнік раённай інспекцыі прыродных рэсурсаў і аховы навакольнага асяроддзя Валерый Бялаўскі і дзяржаўны інспектар Барысаўскай міжраённай інспекцыі аховы жывёльнага і расліннага свету Уладзімір Кароль.
