З поспехам выступаў у многіх гарадах Беларусі, яго сустракалі апладысментамі і ў расійскім Сонечнагорску. А зусім нядаўна ансамбль стаў лаўрэатам III ступені конкурсу «На хвалях творчасці» ХІV абласнога фестывалю народнай творчасці «Напеў зямлі маёй». На сцэну ансамбль «Жывіца» выйшаў разам з дзяўчынкамі аб’яднання па інтарэсах «Чараўніца» Цэнтра дзіцячай творчасці, якія былі апрануты ў касцюмы знакамітай калекцыі «Кветка душа» Аксаны Коваль. Нумар атрымаўся незвычайна яскравым.
Фестываль штогод праходзіць ў Пухавіцкім раёне і лічыцца галоўным форумам аматарскай творчасці Мінскай вобласці, які ахоплівае ўсю жанравую палітру народнага мастацтва. Дарэчы, гэта адна са знакавых культурных падзей традыцыйна праводзіцца пры падтрымцы Мінаблвыканкама. У конкурснай праграме прымалі ўдзел аматарскія калектывы народнай творчасці з усіх рэгіёнаў Міншчыны. Вакальныя здольнасці прадэманстраваў і народны ансамбль народнай песні «Жывіца» Крупскага РЦК.
– Гэты фестываль быў своеасаблівым экзаменам, вынікам творчай дзейнасці, – дзеліцца ўражаннямі кіраўнік ансамбля Маргарыта Еўсявіцкая. – Прыемна было пачуць віншаванні ў адрас прадстаўнікоў культурнай сферы ад намесніка старшыні Мінскага абласнога выканаўчага камітэта Віктара Сірэнкі. Феерычнай і эмацыянальнай часткай для нас стала конкурсная праграма «На хвалях творчасці». Мерапрыемства захапляла поліфаніяй гукаў, рытмаў, найгрышаў. Мы змаглі не толькі наталіцца жывой народнай творчасцю, пачуць сугалоссе лепшых калектываў Міншчыны, але і паказаць сябе, свае таленты на такім сур’ёзным конкурсе. Выступленні ацэньвала журы на чале з кампазітарам Ігарам Лучанком. Былі і такія аўтарытэтныя асобы, як мастацкі кіраўнік Нацыянальнага акадэмічнага народнага хору імя Г. Цітовіча Міхаіл Дрынеўскі, кампазітар Леанід Захлеўны і іншыя. А пасля конкурсу мы змаглі крыху расслабіцца і атрымаць незабыўную асалоду ад выступлення Нацыянальнага акадэмічнага народнага аркестра Беларусі імя І. Жыновіча. Мы вельмі ўзрадаваліся, калі даведаліся, што сталі лаўрэатамі – атрымалі дыплом III ступені. Такі вынік вельмі годны для нас. Яшчэ акрамя дыплома мы атрымалі каштоўны прыз – партатыўны камп’ютар.
Нумар сапраўды атрымаўся яскравым. Спачатку на экране з’яўляецца відэа, дзе прыемны голас распавядае легенду пра папараць-кветку. Потым ужо на сцэну выходзіць «Жывіца». У той час, як ансамбль спявае прыгожую песню «Кветка душа», дзяўчынкі, нібы пялёсткі той самай чароўнай папараць-кветкі, у касцюмах выконваюць танец. Сюжэт легенды прагледжваецца на працягу ўсяго танца. У канцы кветка распускаецца.
– Нумар зрабілі хутка, дзякуючы суладнай працы, – гаворыць Маргарыта Еўсявіцкая. – У вогуле, у нас атрымалася, на мой погляд, эфектна і зачаравальна. Дарэчы, ідэю пастаноўкі прапанавала дырэктар РЦК Галіна Бандарык, а вось з харэаграфіяй дапамагла метадыст РЦК Надзея Смолікава.
