У мінулы чацвер ва ўсіх аддзяленнях паштовай сувязі раёна праходзіў абласны дзень падпісчыка. Як і заўсёды, нашы карэспандэнты пабывалі ў гарадскім аддзяленні Крупкі-1. Адразу варта зазначыць, што многія і многія гараджане прымеркавалі наведванне гэтага аддзялення менавіта на чацвер. Аб тым сведчыць колькасць выпісаных экзэмпляраў раёнкі.Пачатак акцыі быў прызначаны на 11 гадзін. Аднак жыхары горада прыйшлі задоўга: хтосьці стаяў у чарзе, каб заплаціць за камунальныя паслугі, хтосьці атрымліваў пенсію або набываў пераднавагоднія паштоўкі, а хтосьці бавіў час у чаканні пачатку Дня падпісчыка. Калі ж завітаў грамадскі распаўсюджвальнік рэдакцыі і да яго далучыўся аператар паштовай сувязі, адразу выстраілася чарга. І падпіску на раённую газету, дарэчы, усе рабілі адразу на першае паўгоддзе, выказваючы пры гэтым словы ўдзячнасці ў адрас свайго любімага выдання.
– Заўсёды імкнуся прыйсці ў аддзяленне паштовай сувязі менавіта ў абласны дзень падпісчыка, – зазначыў жыхар горада Васіль Сяргун. – Загадзя ў раённай газеце робіцца паведамленне, што рэдакцыя аб’яўляе акцыю. Сэнс яе заключаецца ў тым, што той, хто аформіць паўгадавую падпіску на «Крупскі веснік», атрымлівае бонус – бясплатную падпіску на месяц. Таму і скарыстоўваю такую магчымасць з задавальненнем і ўжо не першы раз. Гады тры запар не плачу за газету за першыя месяцы паўгоддзяў – ліпень і студзень. Сёння зноў аформіў падпіску на раёнку толькі на 5 месяцаў. Гэта акцыя вельмі добрая і выгадная. І самі бачыце, колькі гараджан прыйшлі ў аддзяленне, каб прыняць у ёй удзел.
І сапраўды, яшчэ ў чэрвені рэдакцыя бясплатна аформіла падпіску на раённую газету на студзень 2018 года больш чым ста крупчанам.
Усяго ў Дзень падпісчыка «Крупскі веснік» толькі ў гарадскім аддзяленні паштовай сувязі падпісалі 120 чалавек, у сельскіх і перасоўных аддзяленнях паштовай сувязі выпісана 159 экзэмпляраў раёнкі.
Толькі станоўчыя водгукі ў адрас раённай газеты гучалі ад нашых пастаянных падпісчыкаў – Людмілы Шалак, Іі Лучына, Валянціны Буронышавай, Тамары Асіповіч, Галіны Шукюравай, Людмілы Валчок, Тамары Пратаповіч, Надзеі Жаланнай, Святланы Гудым і многіх іншых. Агульнае іх меркаванне: «Раённую газету заўсёды чакаем з нецярплівасцю, чытаем ад першай старонкі і да апошняй, ведаем усіх яе аўтараў. Таму і жадаем журналістам новых творчых поспехаў, вострага пяра і здзяйснення ўсіх мар і надзей!»
Напрыканцы нагадаем, што да заканчэння падпіскі на газеты і часопісы на наступны год застаецца не так і многа часу. Таму паспяшайцеся зрабіць падарунак сабе і сваім родным, сябрам, знаёмым – падпішыце іх на раённую газету «Крупскі веснік»! І мы зноў будзем разам!
