Члены ўчастковай выбарчай камісіі ўчастка для галасавання № 4 па выбарах дэпутатаў мясцовых Саветаў дэпутатаў дваццаць восьмага склікання, які размяшчаецца ў будынку Ігрушкаўскага сельскага выканаўчага камітэта, канстатуюць, што да правядзення выбараў ужо гатовы.– У спісы грамадзян, якія маюць права прымаць удзел у выбарах, уключаны выбаршчыкі з аграгарадкоў Ігрушка і Узнацк, вёсак Самаседаўка, Каралёва, Малое Острава, Валкавыск, Гута, Двор Пярэсіка, Старая Пярэсіка, Кругліца, Батуры, – зазначыла старшыня ўчастковай выбарчай камісіі Надзея Раманчук. – Большасць з іх людзі сталага ўзросту. Але ёсць пяць маладых людзей, якія будуць галасаваць упершыню. Для іх мы падрыхтавалі сувеніры. У складзе камісіі працуюць 9 чалавек.
Работа непасрэдна з выбаршчыкамі – галоўнае ў дзейнасці камісіі. Таму тут зроблена ўсё неабходнае па ўдакладненні спісаў, абсталяванні спецыяльных стэндаў і куткоў выбаршчыкаў, на якіх размешчана адпаведная інфармацыя. Наведвальнікі ўчастка для галасавання могуць азнаёміцца з Канстытуцыяй і Выбарчым кодэксам Рэспублікі Беларусь, зборнікам дакументаў аб выбарах у мясцовыя Саветы дэпутатаў Рэспублікі Беларусь дваццаць восьмага склікання, метадычнымі дапаможнікамі, нарматыўнымі дакументамі і іншымі матэрыяламі.
Перадвыбарная кампанія – час напружаны. І старшыня ўчастковай выбарчай камісіі, яе намеснік, сакратар і члены камісіі працуюць па запытах выбаршчыкаў, прапаноўваюць ім звярнуць увагу на інфармацыю аб нумарах тэлефонаў Цэнтрвыбаркама, Мінскай абласной, акруговай і Крупскай раённай камісій. Яны змешчаны ў кутку выбаршчыка і, патэлефанаваўшы па ўказаных нумарах, можна атрымаць адказ на любое пытанне. З інфармацыяй аб ходзе выбараў можна таксама пазнаёміцца на сайце Крупскага райвыканкама.
Яшчэ раз нагадаем, што 9 студзеня пачалася рэгістрацыя кандыдатаў у дэпутаты мясцовых Саветаў, якая падоўжыцца да 18 студзеня ўключна. Пасля рэгістрацыі кандыдаты змогуць пачаць перадвыбарную агітацыю.
