Многія крупчане падпіску на свае любімыя газеты і часопісы прымяркоўваюць менавіта да акцыі «Абласны дзень падпісчыка». На паштовых аддзяленнях яны сустракаюцца са сваімі знаёмымі, цікавяцца навінкамі перыёдыкі, гартаюць часопісы, што ім прапаноўваюцца для азнаямлення і, магчыма, далейшай выпіскі.Вось і на гэты раз у гарадскім аддзяленні паштовай сувязі нас ужо чакалі. Першай у чарзе стаяла Вольга Мартыненка, якая адразу ж аформіла падпіску на «Крупскі веснік» і яшчэ некалькі выданныў. Падчас размовы Вольга Іванаўна гаварыла аб тым, што раённую газету выпісвае з таго часу, як сям’я пасля аварыі на Чарнобыльскай АЭС з Хойніцкага раёна перасялілася на Крупшчыну. «І я, і муж чытаем сваю раёнку з першай старонкі да апошняй, – дадала яна. – Нас тут цікавіць усё. За час, што жывём у раёне, пазнаёміліся з многімі людзьмі, набылі тут добрых сяброў і суседзяў. У абавязковым парадку праглядваем віншаванні з адметнымі датамі. І тут таксама сустракаюцца знаёмыя прозвішчы. Раёнку выпісвалі, выпісваем і будзем выпісваць».
Аналагічныя выказванні мы чулі ў гэты дзень з вуснаў Ядзвігі Крыварот, Ірыны Каленцыёнак, Святланы Любянковай, Таццяны Лысакоўскай, Святланы Трус, Галіны Лісоўскай, Ларысы Матусевіч і іншых нашых чытачоў. Да месца адзначыць, што прыхільнікі раённай газеты, якія завіталі ў гарадское аддзяленне сувязі, атрымлівалі ў падарунак насценны каляндар на 2018 год і кішэнныя каляндарыкі з лагатыпам «Крупскі веснік».
Мы ўвачавідкі пераканаліся ў належнай арганізацыі абласнога дня падпісчыка. Усім, хто заходзіў у гарадское аддзяленне сувязі, каб заплаціць камунальныя паслугі, атрымаць пенсію, зрабіць якую-небудзь пакупку, аператары ў абавязковым парадку напаміналі аб дні падпісчыка і прапаноўвалі выпісаць газету або часопіс. А для больш хуткага абслугоўвання за спецыяльным сталом афармленнем абанементаў займаўся яшчэ адзін аператар сувязі.
– Час бяжыць непрыкметна. Да заканчэння падпісной кампаніі на ІІ квартал бягучага года застаецца роўна тыдзень, – гаварыла начальнік Крупскага ўчастка паштовай сувязі Людміла Пацэева, якая на пачатку правядзення абласнога дня падпісчыка прысутнічала непасрэдна ў зале. – Хачу звярнуцца да тых крупчан, якія яшчэ не падоўжылі падпіску, паспяшацца ў гэтыя дні ў паштовыя аддзяленні па месцы жыхарства, звяртацца да сваіх паштальёнаў, да грамадскіх распаўсюджвальнікаў друку. Вас чакаюць у 17-ці стацыянарных паштовых аддзяленнях, трох перасоўных і на мотадастаўцы. Паспяшайцеся!
