Не будзем аспрэчваць ісціну, што зямля – наша галоўная каштоўнасць. Аднак варта адзначыць, што адносіны да яе далёка не ўсюды адпаведныя. Можна ўбачыць плошчы, якія зарастаюць пустазеллем, завалены смеццем, не выкарыстоўваюцца па прызначэнні. Каб пераканацца ў тым, што робіцца па навядзенні парадку на зямлі ў Хацюхоўскім сельсавеце, у адзін з гэтых красавіцкіх дзён мы наведалі яго асобныя вёскі.– На перыяд месячніка запланаваны работы літаральна ў кожным населеным пункце, – гаварыў старшыня Хацюхоўскага сельскага Савета дэпутатаў Віктар Кострыкаў. – І не толькі. Асобным пунктам стаіць навядзенне парадку на сельскіх могілках і добраўпарадкаванне помнікаў і воінскіх пахаванняў. Ужо цяпер многія жыхары аграгарадкоў і вёсак прыводзяць у належны стан пасля зімы тэрыторыю ля сваіх сядзіб, прыбіраюць смецце, рамантуюць агароджы. 7 красавіка падчас суботніка спецыялісты нашага сельвыканкама займаліся ўборкай смецця на могілках аграгарадка Дакудава, работнікі закрытага акцыянернага таварыства «Хацюхова» наводзілі парадак на могілках у вёсцы Новыя Шчаўры, а супрацоўнікі Крупскага раённага аддзела па надзвычайных сітуацыях – на могілках у вёсцы Вялікае Восава. Настаўнікі і тэхнічныя работнікі Хацюхоўскай сярэдняй школы ў гэты дзень прыводзілі ў парадак парк, што знаходзіцца насупраць школы, што ў вёсцы Старыя Шчаўры.
І тут да месца адзначыць, што работа ў гэтым парку вялася і ў панядзелак. Дырэктар Хацюхоўскай школы Васіль Барысенка, які прысутнічаў тут, расказаў, што ўжо ўбрана старая агароджа, спілаваны аварыйныя дрэвы, а ў самыя бліжэйшыя дні будзе высечана ўсё астатняе кустоўе і да канца зроблена абрэзка дрэў.
Клапоцяцца аб добраўпарадкаванні вёскі Старыя Шчаўры яе стараста Васіль Бачышча і дэпутат Аляксандр Гарбачоў. Яны зазначылі:
– Пагадзіцеся, што сельскія жыхары, як ніхто іншы, захавалі шчырасць у адносінах да родных мясцін. І вёска для іх – гэта не проста месца жыхарства, а менавіта радзіма, без якой яны сябе і не ўяўляюць. Улетку сваімі сіламі абкошваем траву і пустазелле, сочым за рэгулярнай уборкай пастаўленых у населеным пункце кантэйнераў, пры неабходнасці можам спілаваць дрэвы. Традыцыйны наш клопат – вясковыя могілкі. За імі замацавана прадпрыемства меліярацыйных сістэм, але і самі вяскоўцы не застаюцца абыякавымі да парадку на ім, прыбіраюць магілы, за якімі няма ўжо каму даглядаць. А ад уласнікаў падвор’яў і прысядзібных участкаў патрабуем не проста навесці парадак на сваёй тэрыторыі і на вуліцах, а зрабіць яго ідэальным.
– Наогул, працы ў сельсавеце ў плане добраўпарадкавання шмат, – адзначыў напрыканцы Віктар Кострыкаў. – Вялікая праблема ў нас пакуль з пад’ездамі да могілак вёсак Казубец, Заполле, Хацюхова. Але мяркуем, што да Радаўніцы хоць крыху падсохне і пастараемся зрабіць падсыпку. Задзейнічаны не толькі арганізацыі і ўстановы, што знаходзяцца на тэрыторыі сельсавета, але і замацаваныя. Гэта, у прыватнасці, філіял ДРБУ № 164, Крупскі РЦГіЭ, ПМК-196, райпалівазбыт, Крупскі льнозавод і іншыя. А каб кожны населены пункт стаў прывабным, рабіць гэта трэба ўсім разам.
