Як правіла, рух соку пачынаецца ў канцы сакавіка (сёлета, праўда, тэрміны крыху зрушыліся) і працягваецца да з’яўлення першых лісточкаў. На гэты перыяд і прыходзіцца масавы збор бярозавага соку – яго нарыхтоўваюць і насельніцтва, і лясгасы. Аднак галоўнае – не нашкодзіць дрэвам! Вось што нам расказала намеснік дырэктара па ідэалагічнай рабоце ДЛГУ «Крупскі лясгас» Наталля КАМОВІЧ.– Рыхтавацца да сезона па збору соку мы пачынаем загадзя. Спачатку з ляснога фонду падбіраюцца падыходзячыя дзялянкі. Нарыхтоўка бярозавага соку ажыццяўляецца на ўчастках ляснога фонду не раней чым за пяць гадоў да наступлення ўзросту вырубак лесу, а таксама на ўчастках ляснога фонду, прадастаўленых для рубак галоўнага карыстання. Нарыхтоўка можа ажыццяўляцца на ўчастках ляснога фонду, на якіх праводзяцца іншыя вырубкі і вырубкі прамежкавага карыстання, з ліку дрэў, якія належаць вырубцы ў адпаведнасці з правіламі вырубак у Рэспубліцы Беларусь.
Нарыхтоўка бярозавага соку грамадзянамі для ўласных патрэб робіцца без выпіскі ляснога білета на ўчастках лесу, вызначаных у кожным лясніцтве. Для гэтага яны павінны звярнуцца ў лясніцтва або да майстра лесу па месцы жыхарства для ўказання ім участкаў, вызначаных для нарыхтоўкі соку, правядзення інструктажу аб правілах падсочкі і, пры неабходнасці, аказання дапамогі ў яе ажыццяўленні.
Калі вы ўсё ж вырашылі нарыхтоўваць сок самастойна, засвойвайце наступныя правілы падсочкі. Народная мудрасць вучыць збіраць сок з «сонечных» бяроз. Лічыцца, што сок дрэў, якія атрымалі вялікую «порцыю» святла, саладзейшы. Раім таксама звярнуць увагу на знешні выгляд бярозы. Дрэва павінна быць без усыханняў, без якіх-небудзь іншых пашкоджанняў ствала ці кары. Любая загана адбіваецца і на сокаруху, і на якасці самога соку.
І яшчэ. Наталіўшы смагу, важна не забыць залячыць параненыя дрэвы. Самы даступны спосаб – замазаць іх глінай. Так мы механічна спыняем здабычу соку, але не яго рух унутры дрэва. Варта перыядычна правяраць замазаныя адтуліны. Калі скрозь гліну па-ранейшаму прасочваецца сок, трэба некалькі разоў паўтарыць працэдуру замазвання. Пройдзе год – і вы зноў захочаце папіць гэтай жыватворнай вільгаці. Таму паклапаціцеся аб бярозах, якія шчодра падзяліліся з вамі сваім сокам.
Рэалізацыя бярозавага соку грамадзянам будзе праводзіцца ў Крупскім, Бобрскім вопытна-вытворчым, Гумнаўскім, Выдрыцкім, Ухвальскім, Стараслабодскім лясніцтвах.
