У рамках Міжнароднага дня Зямлі ў мастацкай галерэі горада адбылася творчая сустрэча мастакоў Крупшчыны з таленавітай моладдзю “Зямля – наш агульны дом”. Навуковы супрацоўнік Крупскай мастацкай галерэі Таццяна Бондар расказала прысутным аб тым, што акцыя ў абарону Зямлі ўпершыню прайшла ў 1970 годзе ў ЗША, а ўжо ў наступным годзе, дзякуючы поспеху першага Дня, быў праведзены Тыдзень Зямлі.
– Аб важнасці мерапрыемстваў, праводзімых у гэты дзень, сведчыць той факт, што ў Дня Зямлі ёсць свая сімволіка – Сцяг, – працягвала Таццяна Сцяпанаўна. – Ён уяўляе сабой фотаздымак планеты з космасу на цёмна-сінім фоне. Традыцыйна Сцяг звязаны з Днём Зямлі і многімі іншымі прыродаахоўнымі, міратворчымі і грамадзянскімі міжнароднымі мерапрыемствамі. Сімвалам з’яўляецца зялёная грэчаская літара тэта на белым фоне. Адметна, што ў Дзень Зямлі ў розных краінах па традыцыі гучыць Звон Міру, які заклікае людзей адчуць усеагульнасць і прыкласці намаганні на абарону міру на планеце і на захаванне прыгажосці нашага агульнага дома. Звон міру – сімвал спакою, мірнага жыцця і дружбы, вечнага братэрства і салідарнасці народаў. І ў той жа час – гэта заклік да дзеяння ў імя захавання міру і жыцця на Зямлі.
Падчас творчай сустрэчы гаварылася аб тым, што людзі самі губяць сваю планету: высякаюць лясы, забруджваюць паветра, зямлю і ваду, асушаюць вадаёмы. Усё гэта не праходзіць бясследна. Экалагічная сітуцыя, якая склалася сёння на зямлі, з’яўляецца вельмі няпростай і працягвае пагаршацца з кожным годам. Адносіны чалавека да прыроды павінны мяняцца зараз, інакш будзе позна. Аб усім гэтым мы павінны задумацца хаця б у сувязі з Днём Зямлі.
Вельмі эмацыянальна быў успрыняты верш Таццяны Каваленкі аб праблемах экалогіі, які прагучаў з вуснаў самой аўтаркі. У адкрытым дыялогу нашых землякоў-мастакоў Аляксандра Міхеева і Сяргея Варламава са школьнікамі, якія любяць маляваць, размова ішла аб тым, што на сваіх палотнах яны імкнуцца паказаць, якая прыгожая наша зямля, і гэта проста цудоўна, што менавіта на гэты час прыпадае дзень вясенняга раўнадзенства, калі мяняецца рытм планеты і яна пераходзіць на новы віток свайго развіцця, калі адбываецца абуджэнне прыроды і яе абнаўленне.
– Практычна, усе мы пішам карціны аб Зямлі, – гаварыў Аляксандр Міхееў. – І ў сваіх работах стараемся выказаць усе свае пачуцці аб зямлі-матухне. Але каб прырода або пейзаж былі напісаны добра, гэта трэба прапусціць праз сваё сэрца. Я пабываў у многіх мясцінах, але менавіта Крупшчына натхніла мяне на творчасць.
– Што датычыць гэтых дзён, то, зазначу, што яны ўходзяць у глыбіню гісторыі. Дзень вясенняга сонцастаяння адзначаецца з далёкіх часоў, – працягваў Сяргей Варламаў. – Помніце, як сказаў Экзюперы: «Встал поутру, умылся, привел себя в порядок – и сразу же приведи в порядок свою планету». Так павінны рабіць і ўсе мы. А вам, пачынаючыя мастакі, жадаю пісаць, дзейнічаць, развіваць сваю творчасць!
Так, у Дзень Зямлі мы ўшаноўваем нашу планету. Гэта не толькі “зялёнае” свята, але яшчэ адна магчымасць звярнуць увагу сусветнага таварыства на найбольш актуальныя экалагічныя праблемы, якіх сёння больш чым дастаткова. У гэты дзень арганізуюцца розныя мерапрыемствы: навуковыя канферэн-цыі, акцыі, выставы, добраўпарадкоўваюцца тэрыторыі, наводзіцца парадак. І Беларусь не пляцецца ў хвасце экалагічнага марша, наадварот, імкнецца быць у авангардзе. Чысціня гарадоў і вёсак стала нашым своеасаблівым брэндам. У адпаведнасці з даручэннямі Кіраўніка дзяржавы ў краіне з 2002 года рэалізуюцца праграмы па навядзенні парадку на зямлі і добраўпарадкаванні тэрыторый населеных пунктаў. Праведзена ўжо каласальная работа, і яна працягваецца.
Падчас дыялогу нашы мастакі Аляксандр Міхееў і Сяргей Варламаў адказалі на шматлікія пытанні прысутных, пад іх кіраўніцтвам быў створаны праект у выглядзе мастацкіх работ “Зямля – наш агульны дом”.
Так, Зямля – наш агульны дом. Гэта не славесны штамп, а аксіёма, як і тое, што ўсе мы ў адказе за будучае нашай планеты.
Фота Аляксандра БУДЗЬКО.
