Асноўныя дзеянні разгорнуцца ў рэканструяваным парку плошчай 25 гектараў. Хаця Дзень беларускага пісьменства – 2 верасня, але святочныя мерапрыемствы ў Іванава пачнуцца яшчэ 1 верасня і ахопяць не толькі гарадскія вуліцы і плошчы, але і наваколле: госці Дня пісьменства змогуць пабываць на свяце духавой музыкі «Фанфара-2018» і абласным пленэры мастакоў-разьбяроў, пачуць паэтычна-музычныя чытанні «Янаўскія замалёўкі» проста з гарадскіх балконаў і павучыць з падказкамі друкаванага дапаможніка адмысловую лабарскую гаворку, зазірнуць у незвычайны Дом траўніка ў вёсцы Стрэльна і знакаміты музей народнай творчасці ў Моталі...У гэты дзень на пляцоўцы ля Іванаўскага раённага Цэнтра культуры і народных традыцый адбудзецца тэатралізаванае прадстаўленне «Запрашаем да Мэйты. Лабурская карчма». А вечарам у тым жа месцы запланавана этнадыскатэка «Палескія вытылінгічы».
Як вядома, галоўнай тэмай свята пісьменства ў Іванаве стане Год малой радзімы. Сваё адлюстраванне ў праграме знойдзе таксама вялікі «ўраджай» юбілеяў беларускіх паэтаў і пісьменнікаў: Адама Міцкевіча, Вінцэнта Дуніна-Марцінкевіча, Янкі Маўра, Платона Галавача, Максіма Гарэцкага, Эдзі Агняцвет, Алеся Бачылы, Яўгеніі Янішчыц, Анатоля Грачанікава і многіх іншых. Не застануцца без увагі і іншыя знакавыя для нашай культуры даты: 400-годдзе першага «Буквара», 95 гадоў з часу выдання «Новай зямлі» Якуба Коласа, 595-годдзе самога Іванава.
Традыцыйны міжнародны «круглы стол» з удзелам беларускіх і замежных літаратараў, які ладзіцца ў рамках Дня беларускага пісьменства з 2007 года, сёлета пройдзе пад дэвізам «Мастацкая літаратура як шлях адзін да аднаго» і збярэ ўдзельнікаў як мінімум з 13 краін свету – ад Азербайджана да Эквадора. Не менш цікавымі абяцаюць стаць навукова-практычная канферэнцыя «Іванаўскія чытанні», фінал рэспубліканскага дзіцячага конкурсу юных чытальнікаў «Жывая класіка», уручэнне Нацыянальнай літаратурнай прэміі, прадстаўнічы фестываль кнігі і прэсы, на якім у рэжыме нон-стоп з паўдня да вечара будуць праходзіць прэзентацыі, аўтограф-сесіі, выставы і творчыя акцыі, мастацка-тэатралізаваная дзея «Малой радзіме пакланюся!» у адкрытай глядзельнай зале больш як на 1 000 месцаў і вялікі вячэрні канцэрт «Льецца песня над Палессем».
Карацей кажучы, праграма юбілейнага нацыянальнага культурнага свята настолькі насычаная цікавымі падзеямі, што яго гасцям лепш загадзя прадумаць маршрут, каб пачуць і ўбачыць як мага больш.
У канцы дня на галоўнай сцэне свята вымпел перададуць наступнай сталіцы Дня беларускага пісьменства – гораду Слоніму.
