– Сваё волевыяўленне сюды прыйдуць выказаць 863 выбаршчыкі з 11 блізляжачых вуліц і 6 завулкаў горада Крупкі, з іх 6 чалавек будуць галасаваць упершыню, – адзначыла старшыня ўчастковай камісіі Таццяна Казлоўская. – Падрыхтоўка да выбараў праводзілася ў строгай адпаведнасці з заканадаўствам. Участак забяспечаны метадычнай літаратурай, устаноўлены кабіны і ўрна для галасавання, праведзены ўсе мерапрыемствы па пажарнай і грамадскай бяспецы.
Пабываўшы на ўчастку, мы пераканаліся, што там сапраўды зроблена ўсё, каб прыняць выбаршчыкаў. На спецыяльным стэндзе змешчана неабходная інфармацыя, што тычыцца правядзення выбараў. Тут можна пазнаёміцца са складам выбарчай камісіі, графікам яе работы, планам арганізацыйных мерапрыемстваў. Камісія вельмі ўважліва папрацавала над удакладненнем спісаў, і цяпер кожны жадаючы можа азнаёміцца, ці ёсць там яго прозвішча.
– І людзі актыўна прыходзяць на ўчастак для галасавання, знаёмяцца з інфармацыяй аб кандыдатах у Прэзідэнты, задаюць пытанні, на якія атрымліваюць адказы, – працягвала Таццяна Казлоўская. – Мы стараемся зрабіць усё, каб участак не проста быў поўнасцю гатовы да прыёму выбаршчыкаў, але і каб там была ўрачыстая атмасфера, адпаведная гэтай важнай для ўсіх нас падзеі. А для выбаршчыкаў, якія прыйдуць галасаваць упершыню, падрыхтаваны сувеніры.
