У турысцка-спартыўным мерапрыемстве прынялі ўдзел 7 каманд навучэнцаў – а гэта больш за 50 чалавек – з аб’яднанняў па інтарэсах Цэнтра турызму і краязнаўства дзяцей і моладзі Крупскага раёна.Юныя турысты размясціліся на турбазе «Нача». Літаральна на працягу гадзіны на тэрыторыях бівакоў, арганізаваных камандамі, з’явіліся вогнішчы і пачалася падрыхтоўка да прыгатавання абеду. Для хлопчыкаў і дзяўчынак гэты працэс, вядома, вельмі цікавы. Бо прыгатаваная ежа на вогнішчы надзвычай смачная. Заўсёды з цікавасцю назіраеш, як нашы юныя турысты, з задавальненнем і вялікім апетытам, седзячы ля вогнішча, смакуюць прыгатаванае імі самімі.
Такім чынам, пасля ўрачыстага адкрыцця раённай турландыі быў дадзены старт «Арыент-шоу», дзе навучэнцы хутка знаходзілі пазначаныя на карце-легендзе пікеты. Вечарам вакол турысцкага вогнішча адбыўся конкурс мастацкай самадзейнасці на турыстычную тэматыку. Удзельнікі спявалі песні, расказвалі вершы і танчылі. Было вельмі весела, юныя турысты заўзята паказвалі свае таленты і артыстычнае майстэрства. Лепшымі, на думку журы, у дадзеным конкурсе былі гурткоўцы з Каласоўскай СШ, другую пазіцыю ў рэйтынгу занялі артысты-турысты з Ухвальскай СШ і трэцяе месца дасталося камандзе з Нацкай СШ. Пасля адбылася дыскатэка і вечар знаёмстваў. Вядома, адыход да сну крыху зацягнуўся за запланаваныя 23.00, бо хлопчыкам і дзяўчынкам так хацелася пагутарыць адзін з адным і новымі знаёмымі.
На наступны дзень было арганізавана спартыўнае арыентаванне. У лясным масіве каля аграгарадка Нача гурткоўцы з дапамогай компаса і карты-легеды шукалі схаваныя пікеты. Лепшымі ў спартыўным арыентаванні па выніках двух дзён аказаліся каманды з Ухвальскай і Нацкай сярэдніх школ.
Вельмі відовішчнымі былі рухомыя гульні з мячом. Ну, і традыцыйна юныя турысты ставілі палатку на правільнасць і хуткасць. Гэтыя мерапрыемствы прайшлі па-за конкурсам.
Пасля падвядзення вынікаў, віншавання каманд і ўрачыстага закрыцця юныя турысты раз’ехаліся па дамах, каб на занятках гурткоў падвесці вынікі ўдзелу ў турландыі і выправіць пэўныя недахопы, а ў бліжэйшы час зноў паспаборнічаць са сваімі сябрамі і паказаць лепшы вынік.
Сяргей ПРЫСЬ, пазаштатны карэспандэнт.
Фота аўтара.
