Урачыста ўнесены дзяржаўныя сімвалы. Права ўзняць Дзяржаўны сцяг Рэспублікі Беларусь прадастаўлена навучэнцу сярэдняй школы № 1 г. Крупкі Дзмітрыю Галадку. Прагучаў Дзяржаўны гімн Рэспублікі Беларусь.
Са святам павіншаваў крупчан старшыня райвыканкама Вячаслаў Лапатка, пажадаў міру, моцнага здароўя, дабрабыту, плённай працы і новых здзяйсненняў на карысць нашай краіны.
– Сімвалы сучаснай Беларусі адлюстроўваюць гісторыю, культуру, адзінства і імкненне нашага народа жыць у міры і згодзе. Беларускія дзяржаўныя сімвалы абуджаюць пачуццё гонару за краіну і азначаюць, што мы – грамадзяне стабільнай і квітнеючай краіны. Няхай наша Рэспубліка Беларусь заўсёды застаецца моцнай і незалежнай дзяржавай, – падкрэсліў глава раёна.
Клятву вернасці дзяржаўным сімвалам Рэспублікі Беларусь прынеслі навучэнцы гарадскіх школ і гімназіі. У ёй – гонар за Беларусь, адказнасць за яе будучыню, вернасць народу і Радзіме, патрыятызм і захаванне традыцый для будучых пакаленняў.
