Сацыяльныя даследаванні сведчаць: у грамадскай свядомасці беларуская дзяржаўнасць злучана з дзяржаўнай сімволікай – гербам, флагам, гімнам, а таксама Канстытуцыяй. Гэта вельмі важны паказчык кансалідацыі і згуртаванасці грамадства. А што на гэты конт думаюць крупчане:
Ірына ШАБЛОЎСКАЯ, намеснік старшыні Крупскага райвыканкама:
– У мінулым годзе свята ў Беларусі стала адзначацца ў новым фармаце, тым самым аддаем даніну павагі ўсім тром сімвалам. Лічу гэту падзею маркерам нацыянальнай еднасці. Дзяржаўны герб, Дзяржаўны флаг і Дзяржаўны гімн – гэта сімвалы нашай гістарычнай памяці, якія звязваюць разам гераічнае мінулае, сучаснасць і будучыню беларусаў. Важна, што ведаць і паважаць іх вучаць дзетак з самага маленства. Гэта вельмі станоўча адбіваецца на выхаванні асобы дзіцяці, фарміруе павагу да сваёй Радзімы.
У кожным элеменце дзяржаўнай сімволікі нашай краіны закладзены глыбокі сэнс, трэба, каб і дзеці, і дарослыя яго дакладна ведалі, адчувалі сэрцам і душой.
Сяргей ГУР, намеснік старшыні Крупскага раённага аб’яднання Беларускай партыі «Белая Русь»:
– Шанаванне дзяржаўных сімвалаў – паказчык сапраўднага патрыятызму. Бо менавіта яны з’яўляюцца важнейшымі атрыбутамі суверэнітэту і незалежнасці Айчыны. Паказваюць палітычную самастойнасць і нацыянальную самабытнасць, дэкларуюць прынцыпы суверэннай краіны – мір, працу, добрасуседства, вернасць сваім духоўным каштоўнасцям і традыцыям. Свята сапраўды згуртоўвае беларусаў.
Наталля ХАДАСЕВІЧ, студэнтка:
– Адчуваю пачуццё асаблівага гонару, калі гучыць Дзяржаўны гімн Рэспублікі Беларусь. Ён велічны, прыгожы, сэрца адгукаецца на кожнае слова, на кожную ноту. Калі нам расказвалі пра гісторыю яго стварэння, то я даведалася, што аўтар тэксту Міхась Клімковіч пэўны час працаваў у Крупскім раёне. Значыць і мы, крупчане, маем далучэнне да галоўнага музычна-паэтычнага твора нашай краіны.
Аляксандр КАРАНЬ, майстар:
– На прадпрыемствах, ва ўстановах, арганізацыях абавязкова прадстаўлены і выкарыстоўваюцца дзяржаўныя сімвалы. І гэта вельмі правільна. Урачыстасці да знамянальных дат і святаў пачынаюцца з выканання гімна. Наш флаг і герб вельмі адметныя, выклікаюць гонар. Вельмі радуюся, калі дзеці падчас урачыстасцяў не проста слухаюць гімн, а спяваюць яго. Трэба, каб пра нашы дзяржаўныя сімвалы гаварылі як мага больш у сем’ях, каб бацькі ўласным прыкладам дэманстравалі да іх свае паважлівыя адносіны.
