Конкурс у галіне мовазнаўства праводзіўся сярод вучняў 10-11-х класаў устаноў агульнай сярэдняй адукацыі Рэспублікі Беларусь, навучэнцаў устаноў прафесійна-тэхнічнай, сярэдняй спецыяльнай адукацыі, студэнтаў вну і быў прымеркаваны да 95-годдзя Інстытута мовазнаўства імя Якуба Коласа Цэнтра даследаванняў беларускай культуры, мовы і літаратуры Нацыянальнай акадэміі навук Беларусі. Нягледзячы на юны ўзрост, Паліна Нікіценка была дапушчана арганізатарамі да ўдзелу ў конкурсе і годна прадставіла сваю працу «Душа зямлі маёй (асаблівасці гаворкі рэгіёну Малога Палесся ў др.п. ХІХ ст)». Зварот да роднага слова, якое адышло ў нябыт, і стала для дзяўчыны крыніцай натхнення і даследавання. А таксама не застаўся па-за ўвагай вядомых мовазнаўцаў Беларусі і быў адзначаны  дыпломам і памятным падарункам. Цырымонія ўзнагароджання пераможцаў конкурсу адбылася ў Цэнтры даследаванняў беларускай культуры, мовы і літаратуры Нацыянальнай акадэміі Беларусі.

– Мерапрыемства атрымалася не толькі ўрачыстым, але і запамінальным, – дзеліцца ўражаннямі Паліна. – У Цэнтр даследаванняў прыехалі пераможцы з усіх куточкаў Беларусі. Цікава было паслухаць навукоўцаў і вызначыць для сябе прыярытэтныя тэмы, магчыма, далейшых даследаванняў у галіне мовазнаўства. На нейкі час мы, канкурсанты, змаглі таксама адчуць сябе сапраўднымі навукоўцамі, чаму спрыяла акадэмічная атмасфера інстытута і зварот да нас яго дырэктара – старшыні аўтарытэтнага конкурснага журы. Ігар Лявонавіч Капылоў адзначыў, што ўзровень усіх прац, адзначаных дыпломамі, надзвычай высокі, а ў некаторых аўтарах ён бачыць будучых калег.

Дарэчы, Паліна займаецца паглыб­леным вывучэннем беларускай мовы і прымае ўдзел у алімпіядзе па прадмеце з пятага класа. Навуковы дэбют стаў для дзяўчыны паспяховым і, магчыма, лёсавызначальным.

Наталля КУЛАГІНА, настаўнік беларускай мовы і літаратуры Халопеніцкай СШ. Фота прадастаўлена аўтарам.