Выстава прысвечана 90-годдзю з дня нараджэння вядомага беларускага мастака, таленавітага педагога, члена Беларускага саюза мастакоў, заслужанага дзеяча мастацтваў Рэспублікі Беларусь, узнагароджанага ордэнам Францыска Скарыны за заслугі ў развіцці адукацыі і культуры Рэспублікі Беларусь, Барыса Аракчэева.На яе ўрачыстае адкрыццё ў Крупскую мастацкую галерэю імя Барыса Аракчэева прыехалі дзве яго дачкі – Аксана і Алена Аракчэевы (пе-ршая – член Беларускага саюза мастакоў, другая – выкладчык Мінскага дзяржаўнага мастацкага каледжа імя А.К. Глебава), намеснік вучэбнай мастацкай практыкі Мінскага дзяржаўнага мастацкага каледжа імя Глебава Ніна Чарнова, куратар выставы, мастацтвазнаўца, магістр культуралогіі Ксенія Сяліцкая-Ткачова і член Беларускага саюза мастакоў Спартак Аруцюнян.
Падчас аповеду пра Барыса Аракчэева адзначалася, што хаця ён нарадзіўся ў Яраслаўскай вобласці, увесь яго жыццёвы і творчы шлях быў звязаны з Беларуссю. Пасля Вялікай Айчыннай вайны была служба ў Мінскім штабе ваеннай акругі. Яго камандаванне заўважыла ў маладым чалавеку талент мастака і дазволіла датэрмінова дэмабілізавацца, каб ён мог паступіць у Мінскае мастацкае вучылішча. Было гэта ў 1950 годзе. А ўжо праз тры гады ён датэрмінова скончыў гэту ўстанову з адзнакай. Далей была вучоба ў Мінскім тэатральна-мастацкім інстытуце. У мастацкім вучылішчы (цяпер Мінскі дзяржаўны мастацкі каледж імя Глебава) Барыс Уладзіміравіч сем гадоў выкладаў жывапіс і кампазіцыю. Да сваіх студэнтаў адносіўся як да творчых асоб і даваў ім свабоду тварыць, спрабаваць, шукаць. Ён вельмі любіў працаваць на прыродзе і лічыў, што пленэры раскрываюць душу мастака, даюць сілы і натхненне.
І палотны, якія прадстаўлены на выставе, дэманструюць майстэрства мастака ў жанры пейзажу. Многія са сваіх вядомых карцін ён ствараў на аснове раней напісаных пленэрных эцюдаў. Работы навучэнцаў каледжа таксама адлюстроўваюць здольнасць перадаваць сродкамі жывапісу няўлоўныя змены ў стане прыроды, раскрываючы яе веліч і хараство. Такім чынам, можна гаварыць пра глыбокую пераемнасць пакаленняў, у якой спалучаюцца традыцыя, наватарства і сучаснасць.
На сустрэчы выступілі літаральна ўсе госці. Яны яшчэ і яшчэ раз адзначалі, што ў работах і Барыса Аракчэева, і яго вучняў раскрываецца душа, а прадстаўленая выстава – прафесійная, грунтоўная, цёплая. «Сапраўдны майстар заўсёды вучань перад прыродай» – так перайначыла вядомую фразу, раскрываючы тэму выставы, Алена Аракчэева. Словы ўдзячнасці гасцям гаварылі таксама намеснік начальніка аддзела ідэалагічнай работы, культуры і па справах моладзі райвыканкама Таццяна Мельнік і дырэктар Крупскага гісторыка-краязнаўчага музея Тамара Бальбот.
Падкрэслім, што на выставе, якая будзе працаваць да 4 мая, аматары жывапісу змогуць убачыць не толькі творы аднаго з заснавальнікаў сучаснай школы жывапісу Барыса Аракчэева, але і пленэрныя эцюды навучэнцаў Мінскага дзяржаўнага мастацкага каледжа імя А.К. Глебава.
