А па-другое, у адзін з дзён красавіка разам з вучнямі групы падоўжанага дня сярэдняй школы № 3 горада зрабілі падарожжа, з якога даведаліся шмат чаго новага і цікавага.

Бібліятэкар Алена Мазгова пазнаёміла хлопчыкаў і дзяўчынак з гісторыяй стварэння часопіса, нагадала, што першым галоўным рэдактарам яго быў класік дзіцячай літаратуры Васіль Вітка. Затым «Вясёлку» рэдагавалі вядомыя беларускія пісьменнікі Еўдакія Лось і Анатоль Грачанікаў. І вось ужо трыццаць восьмы год свайму любімаму часопісу служыць яго галоўны рэдактар, лаўрэат Дзяржаўнай прэміі Беларусі Уладзімір Ліпскі. Вось што ён сказаў аднойчы: «Вясёлка» – маё жыццё, мой касмічны Байканур, маё шчасце, сонца і паветра, гаючая крыніца творчасці, натхнення і чалавечай уцехі ў зямным раі». Забягаючы наперад, хочацца адзначыць, што ў далейшым падчас правядзення розных конкурсаў вучні беспамылкова паўтарылі прозвішчы галоўных рэдактараў «Вясёлкі».

– А зараз я назаву рубрыкі, пад якімі змяшчаюцца ў «Вясёлцы» цікавыя і змястоўныя матэрыялы, – працягвала Алена Уладзіміраўна. – «Жывая класіка», «Мой лепшы сябар», «Урокі мовы», «Хвілінкі-весялінкі» і іншыя. Да 500-годдзя беларускага кнігадруку, якое адзначаецца сёлета, арганізаваны сумесны праект часопіса «Вясёлка» і Нацыянальнага мастацкага музея Беларусі «Крышку пра кніжку». Шаноўныя рабяты, выбірайце на свой густ верш, казку, апавяданне, загадку, смяшынку, скорагаворку і атрымлівайце асалоду ад сустрэчы з беларускай мовай, узбагачайце сваю душу новымі ведамі пра нашу краіну, яе людзей, іх мудрасць, традыцыі, звычкі.

Падчас прэзентацыі вучні даведаліся, што ў 2013 годзе была заснавана серыя «Бібліятэка часопіса «Вясёлка». І праз год выйшла кніга Уладзіміра Ліпскага «Сакрэты колераў вясёлкі», складзеная з твораў, якія друкаваліся ў часопісе «Вясёлка» на працягу больш як сарака гадоў. Невялікія апавяданні і казкі – нібыта яскравыя колеры сапраўднай вясёлкі – увабралі разнастайныя прыгоды і адкрыцці, якімі так насычана жыццё дзяцей. «Разам з героямі кнігі вы можаце пасмяяцца і крышачку пасумаваць, праявіць дабрыню, дапытлівасць, кемлівасць, уважлівасць і паслухмянасць», – зазначыла бібліятэкар, паказваючы гэту кнігу.

Цікавасць у дзяцей выклікала і наступная інфармацыя. «Я помню ўсё...» – гэта новая кніга з серыі «Бібліятэка часопіса «Вясёлка», дзе сабраны балючыя ўспаміны вядомых беларускіх пісьменнікаў – «дзяцей вайны».  Дарэчы, прэзентацыя гэтай кнігі адбылася на ХХІV Мінскай міжнароднай кніжнай выставе-кірмашы. 

Школьнікі, трымаючы ў руках часопіс «Вясёлка», давалі адказы на пытанні, разгадвалі загадкі, спрабавалі вымаўляць скорагаворкі. Варта адзначыць, што трэцякласнікі – пастаянныя наведвальнікі бібліятэкі і актыўна ўдзельнічаюць ва ўсіх праводзімых тут мерапрыемствах. Выхавальнік групы падоўжанага дня Наталля Петрусевіч расказала, што хлопчыкі і дзяўчынкі ахвотна адклікаюцца на прапанову наведаць бібліятэку, і толькі з пачатку года яны тут пабывалі ўжо шосты раз. Што яны сябруюць з часопісам «Вясёлка», знаёмы з творамі яго аўтараў, бо многія з іх уключаны ў падручнікі для пачатковых класаў. Што «Вясёлка» – сапраўдны скарб для юных сяброў і жаданы госць у дамах і кватэрах.