Вось такія хвіліны хараства падарылі нам Надзея Іванаўна Шынкарова, Ніна Сцяпанаўна Лукашэвіч і Ядзвіга Рыгораўна Багданоўская з вёскі Навесы,  Валянціна Арсенцьеўна Каліноўская з вёскі Красноўка, а таксама Валянціна Васільеўна Кунтыш, Галіна Пятроўна Ганчарова і Марыя Андрэеўна Ганчарова з Халопеніч. З імі мы сустрэліся цёплымі восеньскімі днямі.

Перад намі – яе вялікасці Жанчыны. Шчырыя і сардэчныя, простыя і чуллівыя, добразычлівыя і спагадлівыя, жыццярадасныя і няўрымслівыя. Яны, моцныя перад нягодамі лёсу, з пражытымі гадамі не растрацілі сваёй душэўнай прыгажосці, мудрасці, святла.

– У кожнай з нас свой лёс, але аб’ядноўвае агульнае – мы нарадзіліся ў вёсцы, пражылі і прапрацавалі ў ёй усё сваё жыццё, – гаварыла Валянціна Каліноўская. – Зямля трымалася і трымаецца на шчырых і працавітых людзях. І мне, як брыгадзіру комплекснай брыгады саўгаса «Бобр», пашанцавала менавіта на такіх. Надзея Шынкарова і Ніна Лукашэвіч – паляводы. Вёска Навесы, у якой яны жывуць, уваходзіла ў брыгаду. Колькі спраў перароблена за гады майго брыгадзірства толькі на палетках гаспадаркі, не пералічыш! А яшчэ былі і жывёлаводы. Брыгада ж комплексная. І, без пахвальбы, скажу, што ў саўгасе яна была заўсёды ў перадавіках. Я і сёння з удзячнасцю ўспамінаю многіх і многіх працаўнікоў. Ведала, калі ім даручыш справу, якасць яе выканання можна не правяраць, бо ўсё будзе зроблена сумленна.

І варта адзначыць, што праца паляводаў, жывёлаводаў, механізатараў і самога брыгадзіра ацэнена дзяржавай урадавымі ўзнагародамі. Валянціне Арсенцьеўне – брыгадзіру з 25-гадовым стажам – за атрыманую ўраджайнасць бульбы (звыш 300 цэнтнераў з гектара) быў уручаны ордэн Працоўнага Чырвонага Сцяга.

Ядзвіга Багданоўская працавала малаказборшчыцай. З самай раніцы аб’язджала яна навакольныя вёскі, каб сабраць сырадой у тых, хто ўтрымліваў у сваёй асабістай гаспадарцы кароў. З усім спраўлялася і на рабоце, і дома.

Шмат гадоў аддалі сумленнай працы Марыя Андрэеўна Ганчарова, Валянціна Васільеўна Кунтыш, Галіна Пятроўна Ганчарова і Еўдакія Ігнатаўна Сяргун з Халопеніч. І зараз яны вызначаюцца актыўнай жыццёвай пазіцыяй. Зусім нядаўна жанчыны ўзялі ўдзел у аглядзе-конкурсе кветкаводаў-аматараў, аб’яўленым раённай ветэранскай арганізацыяй сумесна з раённым аб’яднаннем прафсаюзаў. Конкурс называецца «Кветкі міру» і прысвечаны 70-годдзю Перамогі ў Вялікай Айчыннай вайне. Днямі на свяце «Халопеніцкі карагод» жанчыны атрымалі і адзнаку сваёй творчай дзейнасці. Марыя Ганчарова заняла другое месца, а Валянціна Кунтыш – трэцяе, яны ўзнагароджаны дыпломамі адпаведных ступеняў. Галіне Ганчаровай і Еўдакіі Сяргун уручаны сертыфікаты ўдзельнікаў конкурсу.   

...Дзень пажылых адзначаецца ў пару жоўталісцевай восені. Незвычайным цяплом парадавала ўсіх сёлета «бабіна лета». Таму восень свайго жыцця, як і восень года, шаноўныя жанчыны прымаюць з удзячнасцю. Нашы пажаданні ім усім: каб зязюля кукавала яшчэ доўга-доўга, каб у вокны дамоў заўсёды свяціла сонейка, каб хваробы абыходзілі бокам, каб заўсёды заставаліся бадзёрымі, а кожны новы дзень прыносіў толькі радасць.