Захаваць ураджай нават у складаных надворных умовах – пад такім дэвізам працуюць механізатары адкрытага акцыянернага таварыства «Старасельскае», імкнучыся ў максімальна сціслыя тэрміны сабраць збожжавыя. Практычна штодзень дождж падмочвае пасевы. Тэмпы работ прыпыняюцца, але не згортваюцца. Нават у непагадзь камбайны не пакідаюць поле: як толькі дождж заканчваецца і зерне падсыхае – уборка працягваецца зноў.– Чакаць ад прыроды добрай пагоды і не ўбіраць зерне – вельмі рызыкова. Яно пачынае асыпацца, ды і страты нікому не патрэбны, – гаварыў кіраўнік гаспадаркі Аляксандр Толкач. – Пра вынікі жніва мяркуюць па колькасці намалочанага збожжа і ўраджайнасці. А ў гэтыя дні – і па тэмпах. Што датычыць тэмпаў, яны зноў жа ў многім залежаць ад надвор’я і эфектыўнага выкарыстання збожжаўборачных камбайнаў. Цёплую сонечную пагоду апошніх ліпеньскіх дзён імкнуліся выкарыстаць на ўсе сто працэнтаў – раней выводзілі тэхніку ў поле і працавалі да позняга вечара. У адзін з дзён ліпеня, а дакладней, 27 чысла, было намалочана 511 тон збожжа.
Так, сапраўды, апошнім часам уборцы збажыны старасельцам (і не толькі!) перашкаджаюць дажджы. Але належна прадуманая арганізацыя работы паспрыяла таму, што на дзень наведвання гаспадаркі, а гэта было ў чацвер, 4 жніўня, хлеб тут абмалочаны ўжо на 1618 гектарах, што складае 79 працэнтаў ад усяго кліна (убраць трэба 2 040-гектарную плошчу). Намалочана 3 810 тон збожжа.
Уборка ў ААТ «Старасельскае», як бачым, падыходзіць да фінішу. Праўда, прадукцыйнасць кожнага гектара складае 24,2 цэнтнера, што менш, чым летась. Па словах дырэктара таварыства, на аддачы гектара адбіўся недахоп мінеральных угнаенняў і сродкаў аховы раслін. Многія культуры закранула засуха якраз у час налівання коласа, а затым пасевы пазбіваў град, які прайшоўся па Узнацку, Якімаўцы і іншых населеных пунктах.
Сяўба ж была праведзена своечасова і якасна, бо тут належным чынам спрацавала агранамічная служба. Ды і цяпер, пакуль галоўны аграном Юлія Гара знаходзіцца ў водпуску па догляду за дзецьмі (яна нарадзіла дзвюх дзяўчынак), на старасельскіх палетках шчыруе выконваючы абавязкі галоўнага агранома, студэнт апошняга курса Беларускай дзяржаўнай сельскагаспадарчай акадэміі Максім Толкач, а за ўзнацкія палі ў адказе ўжо больш дзесяці гадоў Мікалай Кавалёнак. Так што, тут усё ў парадку.
Па-добраму сапернічаюць паміж сабой і камбайнеры. Кожны стараецца зрабіць больш, выканаць работу якасна. На ніве штодзень працуюць 12 камбайнаў. Выпрацоўка на адзін камбайн складае да 10 гектараў, пры спрыяльным надвор’і ўбіраецца каля 180—200 гектараў. У лідарах, як і ў папярэднія гады, – адзін з самых старанных і адказных механізатараў Віталь Шарапаў, на рахунку якога звыш 540 тон намалочанага збожжа. Гэта менавіта ў гонар яго і развяваецца Флаг працоўнай славы.
Можна сказаць, з агеньчыкам працуюць таксама і многія экіпажы камбайнаў. Намеснік дырэктара па ідэалагічнай рабоце Алена Галавач у ліку лепшых назвала нам прозвішчы Сяргея Шарапава, Андрэя Ліпчонка, які ў адной звязцы з сынам Паўлам, Васіля Піскунова, напарнікам у якога брат Андрэй. У перадавіках на адвозцы збожжа ад камбайнаў у гаспадарцы знаходзіцца Уладзімір Толкач (ён перавёз ужо 1 197 тон збожжа). Сярод маладых вадзіцеляў вызначыўся Юрый Пыжык, які перавёз 655 тон збожжа новага ўраджаю.
Не змаўкае гул матораў і на збожжатаку. Увішнасць у справе па дасушванні збожжа паказваюць Аляксандр Навіцкі, Мікалай Галавач і Мікалай Макаранка. Дарэчы, тут жа нам расказалі, што якраз напярэдадні з прыемнай місіяй да іх завітала старшыня раённага камітэта прафсаюза работнікаў аграпрамысловага комплексу Вольга Ермаловіч. Падарункі ад райкама прафсаюза былі ўручаны вадзіцелю на адвозцы збожжа Уладзіміру Толкачу, камбайнерам Андрэю Ліпчонку і Сяргею Шарапаву, брыгадзіру Марыі Ляўша. І хаця гэта цырымонія заняла лічаныя хвіліны, прыўзняты настрой ад урачыстага моманту застаўся надоўга.
Кожную раніцу, толькі ступіўшы на тэрыторыю механічных майстэрняў, хлебаробы спяшаюцца ў дыспетчарскую, каб убачыць экран працоўнага спаборніцтва, прааналізаваць свае паказчыкі і паказчыкі калег. Амаль у кожнага з тых, чые прозвішчы змешчаны на бачным месцы, за плячыма не адно жніво. Усе стараюцца і зжаць паболей, і намалаціць, і перавезці.
Да месца адзначыць, што старасельцы імкнуцца выконваць і першую запаведзь хлебароба – здаваць збожжа дзяржаве. З даведзенага задання – 1 330 тон (без грэчкі) – у Маладзечна адвезена 609 тон пшаніцы, а жыта з гаспадаркі пачало паступаць на Барысаўскі камбінат хлебапрадуктаў.
...Са Стараселля мы ад’язджалі сонечнай раніцай. Камбайнеры ўжо накіраваліся на палеткі, углядаючыся ўдалеч збожжавай нівы, услухоўваючыся ў пошум калосся і спевы жыта. Нам жа застаецца шчыра пажадаць: «Толькі добрага вам надвор’я і ўдачы!»
В понедельник, 1 июля, с 8.00 до 17.00 (перерыв с 13.00 до 14.00) начальником отдела статистики Крупского района КАРЕЦКОЙ Еленой Леонидовной будет проводиться «горячая линия» по вопросу несвоевременной выплаты заработной платы.
