У цэлым на Крупшчыне ўбрана амаль палова  пасяўных плошчаў. Бліжэй усіх да фінішу – сельгасфіліял «Шчаўры» ААТ «Здравушка-мілк». За ім – ААТ «Старасельскае», вытворчая пляцоўка «Дворышча» ААТ «АК «Дзяржынскі», ААТ «МайскаеАгра», ААТ «Халопенічы».

А ўжо да серады, 7 жніўня, планку ў тысячу тон узялі камбайнеры і вадзіцелі іншых гаспадарак. Старшыня раённага выканаўчага камітэта Анатоль Козел, старшыня райкама прафсаюза работнікаў АПК Валянціна Козел, старшыня раённай арганізацыі рэспубліканскага грамадскага аб’яднання «Белая Русь» Ірына Шамашова, галоўны спецыяліст аддзела ідэалагічнай работы, культуры і па справах моладзі райвыканкама Людміла Куксіна, першы сакратар раённага камітэта ГА «БРСМ» Уладзімір Рогаў наведалі адкрытае акцыянернае таварыства «Кляновічы» і ўшанавалі двух вадзіцеляў на адвозцы збожжа – Юрыя Кавалеўскага і Генадзя Каспяровіча, якія перавезлі ўжо звыш 1 000 тон збожжа.

Падчас віншавання, якое праходзіла на збожжатоку, Анатоль Козел, уручаючы Падзячныя пісьмы, выказаў працаўнікам глыбокую прызнанасць і ўдзячнасць за бездакорную працу, высокі прафесіяналізм, унесены ўклад ва ўборачную кампанію і дасягнуты намалот у 1 000 тон збожжа. Да віншаванняў старшыні райвыканкама далучылася старшыня РК прафсаюза работнікаў АПК Валянціна Козел, якая таксама ўручыла падарункі і адрасавала Юрыю Кавалеўскаму і Генадзю Каспяровічу пажаданні дасягнуць яшчэ больш высокіх паказчыкаў.

Уручаючы падарунак вадзіцелю Юрыю Кавалеўскаму, самыя шчырыя і сардэчныя словы ў яго адрас гаварыла і старшыня раённай арганізацыі РГА «Белая Русь» Ірына Шамашова.

Тут жа Валянцінай Козел быў адзначаны і кіраўнік ААТ «Кляновічы» Аляксандр Свірыдаў. Падчас кароткай размовы Аляксандр Мікалаевіч заўважыў, што хлопцы на адвозцы збожжа ад камбайнаў надзейныя, працуюць не першы год, таму іх поспех у дасягненні тысячы тон перавезенага збожжа зусім невыпадковы. Дарэчы, Юрый Кавалеўскі і ў мінулым годзе быў у лідарах на перавозцы збожжа і яго прозвішча пастаянна змяшчалася на раённай Дошцы гонару ў газеце «Крупскі веснік».

...На збожжатоку «Ігрушка» ААТ «МайскаеАгра» заслужаныя ўзнагароды, падарункі і віншаванні прымаў вадзіцель Анатоль Куляй, які таксама перавёз тысячу тон збожжа. Ёсць упэўненасць, што Падзячнае пісьмо, віншаванні, шчырыя і сардэчныя словы пажаданняў ад старшыні райвыканкама Анатоля Козела, падарунак і наказ на далейшыя дасягненні ад старшыні райкама прафсаюза работнікаў АПК Валянціны Козел натхняць Анатоля Іванавіча, у якога вадзіцельскі стаж вылічваецца 38 гадамі, на новыя перамогі і здзяйсненні.

...Асобна варта сказаць пра вадзіцеля сельгасфіліяла «Шчаўры» ААТ «Здравушка-мілк» Дзмітрыя Асіповіча. У апошні дзень ліпеня на яго рахунку было 414,16 тоны збожжа, перавезенага ад камбайнаў. Але ўжо ў той дзень Сцяг працоўнай славы на тэрыторыі майстэрняў быў узняты ў яго гонар. Наведаўшы гэту гаспадарку 7 жніўня, мы ўбачылі, што Сцяг працоўнай славы зноў узняты ў гонар Дзмітрыя Асіповіча і за прайшоўшыя дні на аўтамашыне «МАЗ 551605» ён перавёз ужо 1257,48 тон збожжа. Заслужаныя ўзнагароды, падарункі і словы падзякі старшыні райвыканкама і старшыні райкама прафсаюза работнікаў АПК з пажаданнямі здароўя яму і яго сям’і Дзмітрый прымаў з хваляваннем і ўдзячнасцю. У сельгасфіліяле хлопец працуе толькі другі год, раней быў вадзіцелем ААТ «Крупскі райаграсервіс», дзе таксама паказваў прыклады ў працы.

...На жытнёвых палетках за вёскай Якімаўка мы сустрэліся з чарговым нашым героем. Юрый Пыжык – камбайнер ААТ «Старасельскае» – намалаціў ужо звыш тысячы тон збожжа. І зноў віншаванні старшыні райвыканкама і старшыні РК прафсаюза работнікаў АПК, раённай арганізацыі ГА «БРСМ» і РГА «Белая Русь», уручэнне Падзячных пісьмаў, Падзяк і падарункаў. Падчас размовы Юрый зазначыў, што ў яго падрастае сын Лёша і выказаў упэўненасць, што ў далейшым ён стане яму самым надзейным памочнікам.

Відавочна, што ўсе названыя хлебаробы клапоцяцца пра лёс ураджаю, думаюць пра тое, як якасна ўбраць збожжа, імкнуцца  працаваць не на хуткасць, а на рэзультат.