На пачатку снежня ўпершыню на Крупшчыне быў праведзены раённы конкурс сярод вучняў 8-10 класаў, які носіць назву, што сама за сябе тлумачыць галоўную сутнасць удзелу ў незвычайным спаборніцтве юных лінгвістаў – «Гавары са мной па-беларуску». Местам сустрэчы канкурсантаў стала сярэдняя школа № 3 г. Крупкі. Ніхто і ніколі мяне не пераканае, што беларуская мова – непрыгожая, мужыцкая. Яна цудоўная і мілагучная. Беларус, які валодае дастатковым лексічным запасам, каб лёгка выказваць свае думкі на мове продкаў, які ведае гісторыю свайго народа і ганарыцца багатай культурай роднай краіны, не можа не выклікаць пачуцця павагі. І тым больш захапляе, калі сустракаеш моладзь, якая бездакорна размаўляе па-беларуску і запрашае да ўдзелу ў размове аднагодак і настаўнікаў.
– Нам, педагогам, вельмі прыемна назіраць, што многія маладыя людзі сёння лічаць справай гонару добра размаўляць на беларускай мове, – гаворыць загадчык раённага вучэбна-метадычнага кабінета аддзела адукацыі, спорту і турызму Крупскага райвыканкама Таццяна Галоўкіна.– Мы ведаем, што і ў студэнцкім асяроддзі роднае слова можна чуць даволі часта. Прычым размаўляе маладзь не на так званай «трасянцы», а на мове чыстай, блізкай да літаратурнай. Падтрымаць гэта заахвочванне – задача настаўнікаў-філолагаў. Таму сёлета і быў арганізаваны такі патрыятычны конкурс. Праходзіў ён у два туры. У першым удзельнікі прадстаўлялі мультымедыйныя эсэ па тэмах: «Самае каштоўнае на зямлі – жыццё чалавека» (8 клас), «За што мы сёння ў адказе?» (9 клас) і «Жыццё – гэта падарожжа» (10 клас). У другім туры цягнулі білеты і пасля рыхтавалі вуснае выказванне на адну з тэм, якая выпадала кожнаму індывідуальна. Сэнс першай тэмы, як правіла, заключаўся ў цытаце вядомага пісьменніка, другая прапаноўвала паразважаць на адну з праблем сучаснасці. На працягу 10 хвілін вучні рыхтавалі свае прамовы, а потым абаранялі іх. Кожны з удзельнікаў конкурсу змог прадэманстраваць добрае валоданне роднай мовай, а падрыхтаваныя эсэ пацвердзілі, што вучні Крупскага раёна – сапраўдныя патрыёты сваёй Радзімы, ведаюць гісторыю свайго народа, валодаюць граматыкай і тэхнікай беларускага маўлення.
А вынікі конкурсу «Гавары са мной па-беларуску» наступныя. Сярод васьмікласнікаў узнагароду ў выгля-дзе Дыплома першай ступені атрымала Наталля Стадзінчук з Худавецкага вучэбна-педагагічнага комплексу яслі-сад-сярэдняя школа. Дыплом другой ступені ў Лідзіі Былінскай (Крупская раённая гімназія), трэцяй ступені – у Дзяніса Пінчука (Каласоўская СШ) і Любові Матырка (Халопеніцкая СШ). Найвышэйшая ўзнагарода сярод дзевяцікласнікаў трапіла да Наталлі Фаміной з СШ № 3 г. Крупкі, Дыплом другой ступені – да Ксеніі Ляшковай (Каласоўская СШ) і Ірыны Глінчык (Халопеніцкая СШ), Дыплом трэцяй ступені – да Таццяны Баравулі (СШ № 3 г. Крупкі). Дзесяцікласнікі падзялілі ўзнагароды такім чынам: Дыплом першай ступені – у Ганны Хадатовіч (Крупская раённая гімназія), Дыплом другой ступені – у Кацярыны Бубеннікавай (СШ № 1) і Таццяны Макаўкі (Худавецкі вучэбна-педагагічны комплекс яслі-сад-сярэдняя школа), Дыплом трэцяй ступені – у Паліны Пыжык (СШ № 3).
