Пагадзіцеся, што апошнім часам многія сталі больш клапаціцца аб чысціні, прыгажосці мясцін, дзе жывуць і працуюць. Прыемна, што кагорта нераўнадушных расце. Заўважна, як дамы гараджан і вяскоўцаў пераўтвараюцца, робяцца дагледжанымі і прывабнымі. Амаль ля кожнага – кветнікі, газоны, зялёныя насаджэнні. Рамантуюцца агаро-джы, гаспадары старанна абкошваюць прылеглую да сваёй сядзібы тэрыторыю. Клапоцяцца аб добраўпарадкаванні тэрыторый ля адміністрацыйных будынкаў калектывы арганізацый, прадпрыемстваў і ўстаноў.– У горадзе Крупкі і пасёлку Крупскім, як і ў цэлым па раёне, для паляпшэння ўзроўню добраўпарадкавання, актыўнага прыцягнення да гэтай работы працоўных калектываў Крупскім раённым выканаўчым камітэтам за пэўнымі тэрыторыямі замацаваны суб’екты гаспадарання, – расказваў начальнік аддзела жыллёва-камунальнай гаспадаркі райвыканкама Андрэй Крыгін. – Яны і павінны выконваць работы па абкошванні, навядзенні і падтрыманні санітарнага парадку на замацаваных тэрыторыях. Без увагі не будуць пакінуты і дваровыя тэрыторыі, дзіцячыя гульнёвыя пляцоўкі, тратуары і дарожкі. І заўважу, што многія адносяцца да навядзення парадку з усёй адказнасцю. Напрыклад, унітарнае прадпрыемства «ПМК-196», за якім замацаваны ўчастак вуліцы Маскоўскай аўтадарогі Талачын – Мінск, яшчэ на пачатку кастрычніка сваю тэрыторыю давяло да ладу. Добрыя словы можна сказаць у адрас філіяла «Крупскае ўпраўленне магістральных газаправодаў». Упэўнены, кожны, хто праходзіць каля помніка воінам-інтэрнацыяналістам, што размешчаны на вуліцы Чарняхоўскага, заўсёды бачыць чысціню і парадак.
Варта заўважыць, што наша размова з начальнікам аддзела жыллёва-камунальнай гаспадаркі праходзіла падчас рэйду па вуліцах горада. Мы ўвачавідкі пераканаліся, што асобныя арганізацыі месячнік чысціні, можна сказаць, закончылі датэрмінова. У поўнай меры гэта адносіцца да цэнтральнай раённай бальніцы. Уся вялікая яе тэрыторыя абкошана, поўнасцю ўбрана лісце, якое абляцела з дрэў, шматлікія клумбы вычышчаны і зямля ў іх перакапаная. Больш таго, тут вядзецца работа па замене бардзюраў і ўкладцы тратуарнай пліткі.
– У месячнік па навядзенні парадку ўключыліся ўсе арганізацыі, прадпрыемствы і ўстановы, – працягваў Андрэй Крыгін. – Шмат работы яшчэ наперадзе ў «ДРБУ № 164», якому вызначаны ўчастак вул. Маскоўскай, а таксама вуліцы Перамогі, Заслонава, Партызанская і вёска Новая Крупка. Арганізацыя днямі прыступіла да ўборкі. Супрацоўнікі аддзела адукацыі, спорту і турызму актыўна ўдзельнічалі ва ўборцы гарадскога парку, зараз ім трэба пераключыцца на яшчэ адзін аб’ект – берагавую лінію вадасховішча Крупскае, дзе ёсць замацаваны за імі ўчастак.
Праязджаючы па вуліцы Міру, Андрэй Рыгоравіч звярнуў увагу на абуладкаванне вызначанага месца, дзе робіцца новы прыпынак для гарадскога аўтобуса. Там ужо зроблены заезд, які ў хуткім часе мяркуецца заасфальтаваць.
Падчас рэйду мы назіралі, як работнікі камунальнай гаспадаркі ўбіралі і звозілі лісце з вуліцы Савецкай, там таксама ачышчаны клумбы ад кветак, якія ўжо адцвілі, і рыхтуецца глеба пад наступныя пасадкі. Займаюцца камунальнікі і навядзеннем парадку на дваровых тэрыторыях. Сваю работу па вуліцы Маскоўскай выканалі работнікі раённага цэнтра гігіены і эпідэміялогіі, а таксама Крупскага раённага камбіната бытавога абслугоўвання. Добраўпарадкаваны ўжо тэрыторыі дзвюх гарадскіх сярэдніх школ і раённай гімназіі.
Цяпер па рэкамендацыі Міністэрства прыродных рэсурсаў і аховы навакольнага асяроддзя апалае лісце ў грамадскіх парках пераважна ўбіраецца з дарожак і прылеглых да іх тэрыторый. Чаму? Таму, што арганічная маса, перагніваючы натуральным шляхам, павышае ўрадлівасць глебы і абараняе яе бясснежнай зімой. Як сказаў Андрэй Крыгін, у далейшым так будзе рабіцца і ў парку горада Крупкі.
Нагадваем, што акцыя працягнецца да канца кастрычніка. Як бачым, часу не так і многа. Але ж ніхто не стане аспрэчваць, што навядзенне парадку – гэта справа пастаянная. Месячнікі і акцыі толькі ўмацоўваюць гэты акцэнт. Давайце зробім так, каб наш горад заўсёды быў чыстым і прыгожым!
НА ЗДЫМКУ: парадак наводзяць работнікі КУП «Жылцеплабуд».
Фота Аляксандра БУДЗЬКО.
