Што б там не гаварылі, але, на шчасце, мы не перасталі чытаць. У многіх і многіх нашых землякоў – досыць багатыя і змястоўныя дамашнія бібліятэкі. А пабыць адзін на адзін з добрай кнігай – цудоўны і карысны адпачынак. Нярэдка даводзіцца чуць, як людзі цытуюць любімых аўтараў і самі прызнаюцца, што ў пэўных жыццёвых сітуацыях літаратурныя героі становяцца іх арыентырам у паводзінах. 

У вас багатая бібліятэка? Можа, нейкая кніга па-асабліваму закранула ці нават паўплывала на канкрэтны ўчынак? Цікава, калі ў вас ёсць рэдкае выданне ці кніга з аўтографам пісьменніка, паэта ці проста адметнага для вас чалавека. Магчыма, вы захочаце расказаць пра любімы томік вершаў, на які надзвычай адгукаецца ваша сэрца. А можа ў вас ёсць настольная кніга і вы падзеліцеся, чаму менавіта ў ёй вы знаходзіце слушныя парады на ўсе выпадкі жыцця?

Тады мы чакаем вашых допісаў. Няма абмежаванняў у тым, пра што вы напішаце, важны толькі тэматычны накірунак – «Кніга ў нашым жыцці». І, зразумела, жаданне цікава, вобразна, эмацыянальна пра гэта расказаць.

Конкурс будзе доўжыцца паўгода, у гэты час на старонках газеты мы будзем друкаваць вашы допісы. Чакаем матэрыялы для публікацыі да 15 жніўня ўключна. Пра вынікі нашы чытачы даведаюцца ў нумары газеты за 2 верасня, якраз у Дзень беларускага пісьменства.

Пераможцаў чакаюць літаратурныя прызы. 

Рэдакцыйная калегія.