У раёне распрацавана спецыяльная праграма, выкананнем якой займаюцца не толькі арганізацыі і прадпрыемствы, але і пераважная большасць жыхароў Крупшчыны. Многаму ў гэтай справе садзейнічае і правядзенне розных акцый, закліканых актывізаваць работу па прывядзенні ў належны стан тэрыторый населеных пунктаў. Аб’яўлены распараджэннем райвыканкама месячнік па навядзенні парадку на зямлі, добраўпарадкаванні і азеляненні тэрыторый – таксама з гэтага пераліку.
Месячнік, як вядома, будзе доўжыцца да 30 красавіка. Ужо дзве суботы запар крупчане падбіраюць каменне на палетках сельскагаспадарчых прадпрыемстваў, прыводзяць у належны стан тэрыторыі ля арганізацый і прадпрыемстваў, ля жылых дамоў і ў дварах, на грамадскіх могілках, на замацаваных тэрыторыях.
– Вясна – час перамен і абнаўлення. Зрабіць больш прыгожым і чыстым родны горад, вёску, аграгарадок ці пасёлак можа кожны з нас, – зазначае галоўны ўрач Крупскага РЦГіЭ Аляксандр Хадаровіч. – Хочацца звярнуцца да ўсіх жыхароў горада і раёна: давайце наводзіць парадак разам! Падчас правядзення месячніка ўсе разам палепшым санітарны стан тэрыторый і ўнясем свой пасільны ўклад у навядзенне чысціні і парадку на зямлі.
І ў мінулы суботні дзень мы ўвачавідкі пераканаліся, што многімі і многімі крупчанамі быў зроблены асабісты ўклад у добраўпарадкаванне Крупшчыны. У прыватнасці, работнікі Крупскага сельвыканкама, дэпутат мясцовага савета і сацыяльны работнік займаліся ўборкай смецця на грамадзянскіх могілках у вёсцы Майск. У вёсцы Гузовіна на вуліцы Лугавой работнікі Акцябрскага сельвыканкама рамантавалі шахтны калодзеж, а ў вёсцы Прошыка ўбіралі тэрыторыю, прылеглую да будынка сельвыканкама. Шмат было зроблена ў гэты дзень і ў Бобрскім сельсавеце. Так, работнікі Бобрскай урачэбнай амбулаторыі добраўпарадкоўвалі брацкую магілу на вуліцы Зарэчча гарадскога пасёлка, настаўнікі Бобрскай сярэдняй школы ўбіралі прылеглую тэрыторыю да мемарыяла на месцы гібелі Героя Савецкага Саюза В.М. Чабатарова, сацыяльныя работнікі прыводзілі ў парадак тэрыторыю праваслаўных могілак у г.п. Бобр, работнікі Каласоўскай СШ рабілі клумбы і займаліся ўборкай тэрыторыі ля стэлы на брацкай магіле ў вёсцы Стары Бобр.
Уборкай звалак смецця і тэрыторыі па Цэнтральнай вуліцы, зносам згарэлага дома былі заняты ў мінулы суботні дзень работнікі Ухвальскага сельвыканкама, Крупскага ТЦСАН, сацыяльныя работнікі. Высечкай кустоў па вуліцы Лясной, уборкай тэрыторыі за прыпынкам па вуліцы Цэнтральнай аграгарадка Хацюхова, уборкай тэрыторыі сквера насупраць будынка былой школы ў Старых Шчаўрах займаліся работнікі сельвыканкама і Хацюхоўскай сярэдняй школы. Работы па навядзенні парадку вяліся таксама ў Ігрушкаўскім і Халопеніцкім сельсаветах.
Упэўнены, што з завяршэннем месячніка па навядзенні парадку на зямлі і добраўпарадкаванні тэрыторый населеных пунктаў работа не спыніцца.