З раніцы знаёмыя з Мінску патэлефанавалі, каб не забылі ўзяць з сабой парасонікі. Але, забягаючы наперад, адзначым, што амаль чатыры гадзіны, што мы правялі на праспекце Машэрава, яны не спатрэбіліся. Хаця дзесьці гадзін у 19 з лішнім такі дождж ліў, што ледзь спраўляліся «дворнікі». І прагон атрымаўся.
Да трыбун мы падышлі, як, дарэчы, і многія іншыя жадаючыя паглядзець парад, гадзіны за дзве да яго пачатку. Таму ў запасе быў яшчэ час. Каля музея Вялікай Айчыннай вайны ўбачылі, як «лёталі» карабіны і шашкі. Гэта праходзіла трэніроўка роты ганаровай варты. Непадалёк стаяла «каробка» курсантаў агульнавайсковага факультэта Ваеннай акадэміі Беларусі. Усе яны ў касках, плашч-палатках, франтавой форме, з пісталетамі-кулямётамі Шпагіна. Як нам распавялі далей, у гэтым годзе курсанты не толькі апрануць форму франтавікоў, але таксама надзенуць і ўзнагароды сваіх продкаў, якія прайшлі вайну. Пабачылі мы таксама, як падчас рэпетыцыі адбіваўся страявы крок, слухалі выступленне зводнага ваеннага аркестра Узброеных Сіл.
...Роўна ў 22 гадзіны гучным голасам міністр абароны Беларусі Сяргей Раўкоў аб’яўляе пачатак парада. Па традыцыі, урачыстае шэсце адкрыла пешая калона. Першымі перад трыбунамі прайшлі юныя барабаншчыкі – выхаванцы Мінскага сувораўскага вучылішча.
Сцяг Перамогі і штандары 1-га, 2-га, 3-га Беларускіх і 1-га Прыбалтыйскіх франтоў – менавіта гэтыя вайсковыя злучэнні ўдзельнічалі ў Беларускай стратэгічнай наступальнай аперацыі «Баграціён», у ходзе якой была вызвалена наша краіна, – следам за самымі юнымі ўдзельнікамі парада праносяць вайскоўцы роты ганаровай варты.
Упершыню на сталічны праспект выйшаў парадны разлік войскаў тэрытарыяльнай абароны. 180 чалавек з аўтаматамі, мінамётамі, кулямётамі на рэпетыцыі былі ў рабочай форме, але на парадзе будуць, як кажуць, пры парадзе.
Паўдзельнічаць у ваенным парадзе выпаў гонар курсантам Ваеннай акадэміі, ваенна-тэхнічнага факультэта БНТУ, вайскоўцам 120-й і 11-й асобных гвардзейскіх механізаваных брыгад. У складзе пешай калоны прайшлі і разлікі Дзяржаўнага пагранічнага камітэта, унутраных войскаў Міністэрства ўнутраных спраў, Міністэрства па надзвычайных сітуацыях. Усяго – 20 парадных разлікаў.
Парадную механізаваную калону адкрыла легендарная тэхніка – танк Т-34-85. Пасля «прамаршыравалі» браніраваныя машыны, зенітныя ракетныя комплексы, сістэмы залпавага агню, артылерыйскія ўстаноўкі. Вялікае ўражанне на ўсіх аказалі браніраваныя машыны «Кайман», радыёрэлейныя станцыі, мабільныя зенітныя артылерыйскія комплексы «Зеніт», а таксама выратавальная і медыцынская тэхніка. Многія і многія мінчане і госці фатаграфавалі літаральна кожны момант.
Завяршылася свята традыцыйным выступленнем ваеннаслужачых зводнай роты ганаровага каравула з пляц-канцэртам. Сёлета, дарэчы, на думку тых, хто ўжо неаднаразова бачыў парад, выступленне гэтай роты аказалася больш рытмічным і відовішчным дзякуючы новым элементам, якія выконваліся не пад ваенны марш, а пад сучасную музычную кампазіцыю.
Да месца адзначыць, што па заканчэнні генеральнай рэпетыцыі каля баявой тэхнікі можна было сфатаграфавацца. Гэта ж можна будзе зрабіць і 3 ліпеня, калі пройдзе парад.