Сёння добраўпарадкаванне выйшла ўжо на фінішную прамую, і да свята падрыхтавана больш 350 аб’ектаў. Гэта, у прыватнасці, будынкі чыгуначнага і аўтавакзалаў, гарадскі Палац культуры, сем аб’ектаў Нацыянальнага Полацкага гісторыка-культурнага музея-запаведніка, у тым ліку Сафійскі сабор, краязнаўчы музей, мастацкая галерэя, музей беларускага кнігадрукавання. На пляцоўцы ля Сафійскага сабора на паўтараметровы пастамент у выглядзе валуна ўстаноўлены памятны знак «Полацк – калыска беларускай дзяржаўнасці». Макетны міні-горад размесціцца ў адным са сквераў у цэнтры горада.

Рэканструяваны дзве вуліцы, якія знаходзяцца пры ўезду ў Полацк з боку Расіі. Праезная частка расшырана да чатырох палос, з’явіліся пешаходныя і веладарожка, кальцавая развязка. Заасфальтаваны двары, адрамантаваны фасады жылых дамоў, добраўпарадкаваны месцы адпачынку, абноўлены аб’екты адукацыі, аховы здароўя, гандлю і грамадскага харчавання.

На Дзень беларускага пісьменства арганізатары падрыхтавалі насычаную праграму. Святочныя пляцоўкі зоймуць ажно 10-кіламетровую тэрыторыю.

Першы дзень верасня галоўнымі героямі стануць дзеці і моладзь. Яны паспаборнічаюць у Скарынаўскай алімпіядзе, стануць удзельнікамі арт-акцый, майстар-класаў і флэш-мобаў.

Дзень горада, 2 верасня, пачнецца з шэсця працоўных калектываў. Па гарадскіх вуліцах упершыню пройдзе калона з прадстаўнікоў прафсаюзных арганізацый. Яны арганізуюць і выставу. У гэты ж дзень адбудзецца ўрачыстае адкрыццё свята з тэатралізаваным прадстаўленнем і лазерным шоу.

У Музеі беларускага кнігадрукавання, які адкрыўся 27 гадоў таму ў гонар усходнеславянскага першадрукара Францыска Скарыны і размяшчаецца ў былой брацкай школе, помніку архітэктуры ХVІІІ стагоддзя, пройдзе «круглы стол» айчынных і замежных літаратараў. Тут жа адбудзецца прэзентацыя знакамітага першадрукара «Малая падарожная кніжыца» з калекцыі Белгазпрамбанка, можна будзе «пагартаць» яе электронную копію і «прагуляцца» па 3D-друкарні часоў Францыска Скарыны.

Дакрануцца да беларускай кніжнай культуры дазволіць выстава псалтыроў з музейных і кніжных збораў Беларусі. Гэта экспазіцыя будзе працаваць на працягу ўсяго верасня, а палюбавацца «Малой падарожнай кніжыцай» можна будзе да 10 верасня.

Кульмінацыяй 3 верасня стануць уручэнне Нацыянальнай літаратурнай прэміі, першы паказ спектакля полацкага рэжысёра Веры Кісялёвай «Легенда пра Усяслава Полацкага» ў выкананні тэатра «Пілігрым» і прэм’ера сюіты беларускага кампазітара Ганны Кароткінай «Францыск Скарына» ў выкананні арганісткі Ксеніі Пагарэлавай, на якую запрашае канцэртная зала Сафійскага сабора.

У святочныя дні будуць арганізаваны фестываль кнігі і прэсы, выставы з нагоды 135-годдзя беларускіх класікаў Янкі Купалы і Якуба Коласа, канцэрты на шматлікіх пляцоўках, творчыя конкурсы, літаратурна-музычныя кампазіцыі, свята сярэдневяковай культуры «Рубон». Праграму дапоўняць спартыўныя мерапрыемствы, фэст беларускай кухні і прадукцыі айчынных прадпрыемстваў, «Горад майстроў» Прыдзвіння. 

А эстафету Дня беларускага пісьменства палачане перададуць гораду Іванава Брэсцкай вобласці.