Еўрапейскі тыдзень мабільнасці праходзіць з 16 па 22 верасня. Больш як 1460 гарадоў у 40 краінах заявілі пра свой удзел у Еўрапейскім тыдні мабільнасці, у тым ліку 19 гарадоў Беларусі. Між тым усяго два гады таму ў ім удзельнічалі толькі тры нашы гарады.Усе акцыі, якія адбываюцца ў гэты час, нагадваюць людзям пра негатыўны ўплыў аўтамабіляў на навакольнае асяроддзе і прапагандуюць выкарыстанне альтэрнатыўных спосабаў перамяшчэння.
Вось што нам расказала пра Сусветны дзень без аўтамабіля галоўны спецыяліст раённай інспекцыі прыродных рэсурсаў і аховы навакольнага асяроддзя Ніна КРАСЬКО:
– Вядома, што аўтамабілі не толькі забруджваюць атмасферу, але і забіраюць у нас грамадскую прастору: вуліцы і двары, а таксама зялёныя зоны. Ключавым мерапрыемствам Еўрапейскага тыдня мабільнасці з’яўляецца акцыя «Дзень без аўтамабіля», якая пройдзе 22 верасня. У гэты дзень многія жыхары пакідаюць свае машыны на стаянках і ў гаражах, а самі карыстаюцца грамадскім транспартам або веласіпедамі.
На працягу Еўрапейскага тыдня мабільнасці праводзіцца нямала асветніцка-адукацыйных кампаній, пазнавальных мерапрыемстваў, а таксама тэматычныя веласіпедныя і пешыя экскурсіі. Асаблівая ўвага ўдзяляецца дзецям. У прыватнасці, у Мінску мясцовы фонд садзейнічання развіццю міжнароднага дыялогу і супрацоўніцтва «Інтэракцыя» правядзе акцыю «ZUM. Дзеці ў руху». Рэспубліканскі цэнтр экалогіі і краязнаўства запрашае школьнікаў прыняць удзел у экалагічным квэсце «Чыстае паветра».
«Мінскае веласіпеднае таварыства» запланавала правядзенне акцыі «На ровары на працу»: абсталяванне на вуліцах горада энергетычных і інфармацыйных кропак для веласіпедыстаў з фотазонамі, дзе яны змогуць бясплатна пачаставацца гарбатай, кавай, садавіной, атрымаць агітацыйную прадукцыю, інфармацыйныя матэрыялы аб правядзенні ЕТМ. Кульмінацыяй стане Дзень без аўтамабіля. Можна паспрабаваць унесці невялікі ўклад у агульную справу аднаго дня і адмовіцца ад выкарыстання аўтамабіля. Падлічана, што доля шкодных выкідаў у навакольнае асяроддзе прамысловых прадпрыемстваў Мінска – 15-20%, усё астатняе – «заслуга» аўтамабільнага транспарту.
А вось што сведчаць наступныя лічбы: па выніках замераў стану атмасфернага паветра, падчас мінулагодняй акцыі ў Мінску выкіды шкодных рэчываў скараціліся на 170 тон. У 2015 годзе гэтая лічба склала 100 тон.
Акрамя таго, падчас акцыі можна будзе абмеркаваць тэму развіцця веласіпеднага руху, а таксама яшчэ раз напомніць жыхарам аб праблемах, што наносіць аўтамабіль. Карацей кажучы, чым больш людзей хоць бы часам адмовяцца ад асабістага аўто і перасядуць у грамадскі транспарт або на веласіпед, тым чысцейшае будзе паветра, якім мы ўсе дыхаем. Да месца адзначыць, што мерапрыемствы ў Дзень без аўтамабіля будуць арганізаваны і ў нашым раёне.
В среду, 9 октября, с 11.00 до 12.00 по телефону 2-72-41 прямую телефонную линию проведет председатель Крупского районного исполнительного комитета КОЗЕЛ Анатолий Станиславович.
