На гэты час прыпадае і юбілейная дата – 24 лютага споўніцца 90 гадоў з дня нараджэння народнага паэта Беларусі, перакладчыка, лаўрэата Дзяржаўнай прэміі БССР імя Янкі Купалы, ганаровага доктара БДУ Рыгора Барадуліна.
Са школьных часоў мы памятаем, што «трэба дома бываць часцей, трэба дома бываць не госцем, каб душою ты стаў чысцей і не страціў святое штосьці». А кожны вучань спачувае хлопчыку, які чакаў свайго бацьку з вайны, бег насустрач кожнаму ў спадзяванні «пачуць кароткае «Сынок!» і крыкнуць радаснае «Тата!» Але не давялося спраўдзіцца дзіцячым марам – не вярнуўся з вайны бацька. Верш аўтабіяграфічны, а боль ад страты роднага чалавека на ўсё жыццё засталася ў сэрцы пісьменніка.
Паэзія Рыгора Барадуліна надзвычай запамінальная. Бо творчасць паэта вызначаецца разнастайнасцю жанраў, яркай метафарычнасцю, багаццем моўнай палітры, шчырымі глыбіннымі пачуццямі. Скарбы вуснай народнай творчасці, якія перадаліся ад маці і бабулі, знайшлі сваё адлюстраванне ў творах. Мілагучныя вершы яскрава паказваюць гасціннасць і ветлівасць беларусаў, мудрасць народа, вучаць спагадлівасці, дабрыні, любові да роднай зямлі, мовы, прыроды. Вобразы Маці, Радзімы, Бацькаўшчыны сталі манументальнымі ў творчасці Рыгора Барадуліна. Паэзія даспадобы многім чытачам – хвалюе, натхняе, акрыляе роднае слова.
Таму і працягвае дзядзька Рыгор жыць – у вершах і ў памяці людзей.
